Naga Political Issue : Himanta-a'n Nagaland CM leh MLA-te a hmu

Assam chief minister Himanta Biswa Sarma chuan Ningani khanNagaland sorkarin Naga Political Issue buaipui tura Core Committee a din chu meeting a neihpui.

North East Democratic Alliance (NEDA) convener ni bawk. Sarma hi Ningani khan Dimapur-ah a kal a, zanah Chumoukedima-a Niathu Resort-ah meeting hi an nei zui nghal a ni. He meeting-ah hian Nagaland chief minister Neiphiu Rio, Rajya Sabha MP Phangon Konyhak bakah Core Committee member MLA 16-te an tel a, an zingah hian UDA chairman TR Zeliang pawh a tel a ni.

Meeting hi zan rei tak thleng an nei a, mahse an thurelte erawh puanzar a ni lo.

Sarma hian Naga political issue chungchangah Nagaland a tlawh ṭum hnihna a ni. Nikum September thla khan lo tlawh tawhin, hemi ṭum hian sorkar nena inbiakna nei mek, Naga helpawl NSCN(IM) aiawhte nen an inbia a, Nagaland CM Rio-an a ṭawiawm a ni.

Core Committee hian Naga buaina chinfel tura hma an laknaah, Sarma hi NEDA convener a nihna aṭanga hma lakpui turin an sawm a, sorkar laipui dawrna kawngah pawh pui turin an sawm a ni.

Sarma chuan Naga buaina chinfelna tur hian thil ngaihtuah ngai tam tak a awm a, resolution chu sorkar laipui leh NSCN(IM) siam tura dah a ngai a ni, a ti.

Sorkar laipui hian kum 1997 aṭang khan NSCN (M) hi inbiakna neihpui ṭanin, kum 2017 aṭangin Naga National Political Groups (NNPGs) chu inbiakna a neihpui tawh bawk. Kum 2015, August 3 khan NSCN(IM) nen framework agreement an ziak a, kum 2017 November 17-ah NNPG nen Agreed Position an lo ziak tawh bawk.

Mahse NSCN(IM) in Nagaland tana flag leh constitution hran an phut chungchangah tun thlengin inremna hi an la ziakfel thei lo a ni.