Meghalaya : NEHU zirlaiten nawrh huaihawt

Meghalaya-a North Eastern Hill University Students Union (NEHUSU) chuan university-a facility ṭhat tawk loh vanga lungawi lohna lantirin, Ningani khan nawrh an huaihawt.

Zirlaite hian university thuneitute hnenah an thil phutte ziaka thlenin, heng zingah hian hostel-ah tui thianghlim pe tur te, hostel mess food ṭha zawk pe tur te, wifi connection bakah library-a facility tiṭhat tur leh lehkhabute dah thar tura an phutna pawh a tel. Hei bakah hian NEHU Health Center-ah damdawi mamawhte dah tur te, zirlai zawng zawng awm theihna tur hostel siamte an phut bawk.

NEHU campus-a Central Library bulah zirlaite hi pungkhawmin, heta aṭang hian lungawi lohna lantirin adminstrative building panin kawng an zawh a ni. Zirlaite chuan an thil phut tihhlawhtlin a nih loh chuan Vice Chancellor chu bang tura an phut thu an sawi bawk.

VC Prof Prabha Shankar Shukla chuan zirlai nawrh huaihawtte hi hmuin, VC charge a lakna a la rei loh avangin hun pe turin a lo ngen a, university leh zirlai tan theihtawp a chhuah mek tih a sawi. Mahse zirlaite chuan nikum July thla aṭanga VC charge a lak tawh avangin thil siamṭhat ngaite siamṭha turin hun a ngah tawk tawh tih an sawi ve thung.