Karizanga Park tlawhtu nuai 2.75 an tling

Kum 2021-2022 chhungin Assam-a Kaziranga National Park (KNP) leh Tiger Reserve tlawhtu khualzin nuai 2.75 chuang an awm a, heng mite aṭanga sorkarin an hmuh hi cheng vaibelchhe ruk a tling tih Park official-te chuan an sawi.

Kaziranga Park hi Nilaini khan khar a ni a, October thlaa hawn a ni leh ang. Park hi kumtinin fur laiin tuilianin a tihbuai ṭhin avangin June-September thla inkar hi khar a ni ṭhin.

Kum 2021, October aṭanga 2022, May thla chhungin UNESCO World Heritage Park hi mi 2,75,835-in an tlawh hman a ni.

Kum 2020-2021 khan Park tlawhtu khualzin 1,67,644 an awm a, sum hmuh hi Rs vbc 3.6 a tling. Kum 2019-2020-ah mi 1,42,859 in tlawhin, an sum hmuh hi Rs vbc 4.20 a tling a ni.

Park official chuan hri leng vanga hun eng emaw chen khar a nih vang leh, hawn a nih leh hnuah India president Ram Nath Kovind-a'n a tlawh ve leh avangin Park tlawhtu khualzin hi an tam zual phah niin a sawi. Nikum December thla kha thla khat chhunga tlawhtu an tam ber ṭum niin, hemi thla hian mi 55,773 in Kaziranga National Park hi an tlawh.

Kaziranga National Park hi samak ki khat nei awmna hmun a nihna hi khawvel huapin a larpui a ni. Hetih lai hian kar hnih liamta khan Park-a kum hnih chuang zet hmuh ngai tawh loh, golden tiger chu hmuh a ni bawk. He sakei hi samak leh ramsa dangte nena an awmho lai hmuh a ni.

Assam-ah hian sakei hi kum 2018 chhiarpuiah 159 awm chu kum 2021-ah 200-ah an pung a ni. Kaziranga-ah hian 121 awmin, Manas-ah 48, Orang-ah 28 leh Nameri Tiger Reserve-ah pathum an awm.