Manipur Assembly Election: Sorkarna siam tur la chiang lo Congress leh BJP-te'n sorkar siam inbeisei ve ve

Manipur assembly election result chu kar kalta Inrinni khan puan ni tawh mah se, tun thlengin sorkarna siam tur an la hriat loh. Hetihlai hian Congress party leh BJP-te chuan sorkarna siam an inbeisei thu an sawi ve ve.

Kum 15 zet a zawna sorkarna chelh tawh Congress party chuan sorkarna an siam leh ngei dawn tih an sawi a, party mala seat la tam ber niin seat 28 an la a, sorkarna siam turin seat thum chauh an mamawh belh a ni. Hetih lai hian seat 21 latu BJP chuan sorkarna siam turin an dinhmun a ṭha niin an sawi a, party dangte nen

ṭanghoin BJP kaihhruai sorkar thar an din dawn niin an sawi ve bawk. Party lian pahnihte hian sorkarna siam zawk nih tumin theihtawp an chhuah a, hun reiloteah sorkar a din thuai beisei a ni a, state Governor kutah thui tak a innghat a ni.

Congress leh BJP-te'n Governor an dawr

Manipur Deputy Chief Minister G Gaikhangam chuan, "Party lian ber leh, a mala seat la tam ber kan ni a, Chief Minister ni lai Okram Ibobi Singh kan neih bawk avangin, Governor Najma Heptullah-i hian sorkar din turin min sawm ngei kan beisei a ni" a ti. Hetih lai hian BJP chuan sorkarna siam turin thlawptu an ngah tawk niin an sawi a, sorkarna an siam thei tih Pathianni khan Governor hnenah an hrilh. Party hruaitu Himanta Biswa Sarma chuan, "MLA 30 kan nei tawh a, sorkarna siam turin MLA 31 kan nei thuai dawn a ni" a ti.

BJP hian seat 21 chauh a lak avangin, sorkarna siam tur chuan Congress ni lo Independent leh party dang zawng thlawpna an mamawh a ni. Seat li latu Naga People's Front (NPF) chuan BJP an thlawp tur thu an puang tawh a, Lok Janshakti Party (LJP) leh Independent candidate-te chuan BJP kaihhruai National Democratic Alliance (NDA) sorkar din turin BJP an thlawp thu an sawi tawh bawk. Heti a nih chuan BJP hian sorkarna siam tura seat 31 neih ngaiah seat 27 a nei tawh tihna a ni a, MLA pali-te thlawpna an la mamawh a ni. MLA pali nei National People's Party (NPP) chuan Congress nge BJP an thlawp dawn an la tichiang lo a, an thutlukna azirin sorkarna siam tur zawk a hriat theih dawn a ni.

CM Ibobi Singh chuan Pathianni khan Governor a hmu a, party mala MLA ngah ber an nih avanga sorkarna siam tura thlawptu an ngah tawk leh tawk loh House-ah fiah thuai turin a ngen. Hetih lai hian Pathianni vek khan BJP chuan MLA 32-te hming list chu Governor hnenah an thehlut a, sorkar siam turin thlawptu an ngah tawk tih an sawi. BJP hian NPP MLA (4), NPF MLA (4), LJP MLA (1) bakah, Idependent MLA Ashab Uddin leh TMC MLA T Robindro Singh te thlawpna an hmuh tawh thu an sawi.

Independent MLA inchuhna

Congress party chuan, sorkarna siam turin BJP chuan tih hreh an nei lo tih sawiin, Independent MLA Ashab Uddin thlawpna an hmuh theih nan democracy kalhin an che a ni, an ti. Uddin hi Imphal-a airport security-te'n manin, custody-ah dah mek a ni a, ani bakah hian Congress hruaitu Mohammad Nasir pawh hren mek a ni. Heng mi pahnihte hian an nunna a derthawng nia sawiin, himna zawngin Delhi pan an tum a, hren lailawk an ni ta a ni. Finance minister hlui P Chidambaram pawhin BJP chuan Goa leh Manipur-ahte sum an chelek nasa hle tih a sawi.

Independent MLA Uddin hi Jiribam bial aṭanga thlan tlin a ni a, Assam khawpui Guwahati aṭangin Imphal-ah a ṭum a, Congress minister Nadir chuan a ṭawiawm a ni. Nasir chuan, Imphal Airport a thlen hian BJP MLA Biswajit Singh leh Central Industrial Security Force (CISF) official ṭhenkhatte chuan Uddin hi an lo nghak a, CISF official-te puihnain hmun dangah an hruai a ni, a ti. Hemi hnu hian Uddin hi Guwahati lalam a thlawk let leh tih airport security-te chuan an sawi.

He thil thleng hi BJP chuan awmze nei lo leh, intihhming­chhiat tumna mai niin an sawi. CISF lam erawhin thu leh hla an la nei lo thung. BJP general secretary Ram Madhav chuan, kawng hrang hrangin inbeihna thleng mah se hnehna an chang dawn tih a sawi a, House-ah thlawptu an ngah tawk tih fiah thuai an duh tih a sawi. CM Okram Ibobi Singh-a kaihhruai Congress sorkarah mipuiten rinna an nghat ngam tawh lo niin a sawi bawk.

BJP hian sorkarna an siam a nih chuan state general secretary Thongam Biswajit Singh leh senior member N Biren Singh-te chu chief minister ni thei tura hming langsar an ni. N. Biren hi Chief Minister nih tir a, Th. Biswajit chu Deputy Chief Minister-a dah tura ruahmna a awm bawk a ni.

N. Biren hi journalist ṭhin a ni a, O. Ibobi Singh kaihhruai sorkarah hun rei tak chhung party thu puangtu a ni a, election neih hma khan Congress party chhuahsanin BJP a zawm a ni.