Assam sorkar leh ONGC-te hospital din turin inrem

Assam sorkar leh Oil and Natural Gas Cor­poration Limited (ONGC)-te chuan Assam-a multi-speciality hospita­lity din turin, kar kalta Zirtawpni khan Memorandum of Agree­ment (MoA) an ziak.

Multi-speciality hospitality hi Sibsagar district-a Rajabari-ah din a ni dawn a, hemi atan hian cheng vaibelchhe 312.34 ruahman a ni. ONGC chairman-cum-managing director Shashi Shankar chuan, hmarchhak hmasawn zelna tura hmalakna kawng pawimawh tak pakhat a nih thu sawiin, hei hian kawng tam takah hmasawnna a thlen ngei a beisei thu a sawi. Hmarchhak mipuite dinhmun chawikan nan te, economy lama hmasawn zelna tur atan te inremna hi ziah a nih thu a sawi. ONGC hian kum kalta chhung khan, corporate social responsibility atan cheng vaibelchhe 421 a hmang tih sawiin, kum 2016-17 chhunga an sum sen zawng zawng aṭanga hmarchhak hmasawnna atana an sum sen chu 25% a tling tih a sawi bawk.

ONGC Director, V P Mahawar leh Director (HR) D D Mishra-te chuan, hmarchhak mipui kut hnathawktute tan market rate 70% tihhniam sak an tum tih sawiin, hospital facility-ah 33% tihniam sak tum an ni, an ti. ONGC hian he project thawh khatna atan hian cheng vaibelchhe 14.79 chu an hlan tawh a, July 2019-a zawhfel hman turin hospital din a ni ang. Hospital-ah hian internal medicine, paediatric, general surgery, ENT, orthopaedic, gynaeco­logy, obstetric, pulmona­ry medicine leh opthal­mology facility-te dah tum a ni. Hospital dang pawh dinbelh zel a ni ang.