Meghalaya : Civil mi kah chungchangah police suspend

Meghalaya sorkar chuan North Garo Hills district-a civil mi pathum silaia kah an nih chungchangah, mawh­phurtua puh police mi pahnih a suspend.

He thil hi March 6-a thleng kha a ni a, police-te silai hmehpuah chuan civil mi pathum a fuh a ni. He thila mawhphurtua puh Unarmed Branch Sub Inspector W.D. Sangma leh Constable Umakhanta Rabha-te chu kar kalta Zirtawpni khan sorkar chuan suspend an nih thu a puang a ni. He thil thleng hi 2nd Meghalaya Police Battalion, Assistant co­mmandant V.D.S. Rymbai kaihhruaina hnuaiah chhui chian mek a ni.

Resu-Khaldang road-a silai hmehpuahah hian, civil mi - Milseng Sangma, Tubal Sangma leh Janrak Sangma-te chuan hliam an tuar a ni. Chief Minister Mukul Sangma chuan thil thleng hi pawi a tih thu sawiin, hemi chhui tur hian judicial inquiry din a nih tur thu a sawi.

Hetih lai hian Megha­laya-a rorel lai Congress MLA Sengnam N Marak chu, East Garo Hills distric-a sorkar doctor rikrap chungchangah a lakah FIR thehluh a ni.

Marak hi Parliamen­tary Secretary nilai a ni a, kar kalta Zirtawpni khan a lakah hian William­nagar police station-ah FIR thehluh a ni. Dr S M Bujabaruah chuan Marak leh a ṭhiante chu East Garo Hills-a a chenna Rongjeng PWD Inspection Bungalow-ah, March 5 zan zanlai vel khan an kal tih sawiin, an zinga pahnih chuan zu an rui tih a sawi. Zing lam dar 3 leh a chanve velah an chhuahsan chauh niin a sawi a, a chet danah a lungawi loh avangin FIR a thehlut ta tih a sawi.

Parliamentary Secre­tary Marak hi Health and Family Welfare depart­ment changtu a ni a, a lakah hian IPC sections 342 (wrongful confinement), 353 (criminal force to deter public servant from discharge of his duty), 307 (attempt to murder) leh 506 (criminal intimi­dation) tlawhchanin thubuai ziahluh a ni. He thil thlen zan hian Marak hian a phone a pick up lo a, thil thlen dan kimchang hi police-te chuan an chhui chiang mek a ni.