Manipur : A vawi khat nan BJP sorkar dawn? Chief minister atan Biren Singh thlang

Manipur assembly election result chu March 11 khan puan ni tawh mah se, hun eng emaw chen chu sorkarna siam thei tur hriat a ni lo. Tunah chuan Bharatiya Janata Party (BJP) chuan a ṭum khatna atan sorkarna an siam dawn ta niin a lang. BJP chuan Thawhṭanni khan Heingang Constituency aṭanga thlan tlin Nongthombam Biren Singh chu chief minister atan thlan a nih thu an puang. Biren hian sorkarna siam turin Governor Najma Heptulla a hmu thuai dawn niin an tarlang.

Biren Singh-a chief minister atana thlan a nih thu hi Union Power Minister Piyush Goyal leh Union Human Resource Development Minister Prakash Javadekar-te chuan an puang a ni. Biren hi Okram Ibobi Singh-a kaihhruai sorkar-a minister te pawh lo ni tawh ṭhin a ni a, kum 2015 October khan Congress chhuahsanin BJP a zawm a ni. Biren chuan, "Congress party chu sorkar inrelbawlna kawngah a hlawhchham avangin ka chhuahsan a ni. BJP sorkar chuan mipuite tan hna kan thawk dawn a, theihtawp chhuahin state hmasawnna turin kan thawk dawn a ni" tiin thuthar thehdarhtute a hrilh.

Hetih lai hian Okram Ibobi Singh chu Manipur Chief Minister a nihna ṭangin Thawhṭanni khan a bang a, Congress sorkar a ding dawn lo tih a chiang tawha ngaih a ni. Ibobi Singh hi Governor Heptulla-i chuan bang turin a ngen a, Chief Minister thar lakluh a nih tur thu a hrilh a ni. Heptulla-i hian Congress chu party mala MLA ngah ber ni mah se sorkarna siam turin a sawm lo hrim hrim nia sawi a ni. Hetih rual hian Ibobi Singh chuan CM a nihna aṭanga ban a tum loh thu leh, sorkarna siam leh tura thlawptu a ngah tawk thu a sawi nia tarlan a ni bawk.

Governor chuan, “CM Ibobi Singh hian National People’s Party (NPP) MLA pali te thlawpna hmu anga insawiin, lehkha a rawn thehlut a ni. Mahse Ibobi Singh hian NPP office bearer-te aiawhin lehkha hi a rawn keng ngawt thei lo a, an thlawp a nih chuan anmahni ngei an lo kal ang a, ziakin an lo thehlut tur a ni. Hemi a nih avang hian sorkarna siam turin Congress party chuan thlawptu a ngah tawk lo a, Ibobi Singh chu CM a nihna ṭanga bang turin ka ngen ta zawk a ni" a ti. Hei bakah hian Ibobi Singh hian eng thu mah sawi loin a chhuahsan leh tih sawiin, chief minister aṭanga a banna nghah mek a ni, a ti bawk.

Ibobi Singh chuan banna a thehlut lo tih sawiin, "Assembly-ah thlawptu kan ngah tawk tih fiah kan duh a ni, banna ka thehluh leh thehluh lohah buaina tur a awm lo" a ti. Chief Minister chuan MLA 28 an neih bakah, NPP MLA pali-te chuan an thlawp niin a sawi a, sorkarna siam turin MLA an ngah tawk tih a sawi. Congress hi party mala MLA ngah ber an nih avangin, Governor chuan sorkarna siam turin a sawm tura ngaih a ni. Constitutional expert pawhin, Congress chu party mala seat la tam ber a nih avangin, sorkarna siam tura sawm tur an nih thu leh, thlawptu an ngah tawk em tih fiah tura an ngaih thu an sawi.

NPP MLA Vivekraj Wangkhem chuan, Congress party-in NPP-te'n an thlawp anga an sawi chungchang chu thubelhchian dawl lo a nih thu sawiin, BJP an thlawp thu a sawi. A ṭum khatna atan Manipur-ah BJP kaihhruai sorkar a din theih nan an thlawp tih a sawi a, an party chuan a hma pawhin Congress an thlawp loh thu an lo tichiang tawh niin a sawi bawk. Manipur assembly-ah hian seat 60 awmin, BJP chuan seat 21 an la a, party dangte thlawpna an hmuh avangin sorkarna siam turin MLA an ngah tawk nia tarlan a ni. BJP hian Governor hnenah MLA 32-te hming an thehlut tawh a, anmahni thlawptu zingah hian Independent MLA leh Congress MLA pakhat pawhin an thlawp nia tarlan a ni. BJP General Secretary Ram Madhav leh Assam Finance Minister Hemanta Biswa Sarma pawhin MLA 32 an neih thu hi an sawi ve bawk.

Hetih lai hian Nagaland Chief Minister Shurhozelie Liezietsu chuan, Manipur-ah sorkarna siam turin Naga People’s Front (NPF) chuan thawhpui an la nei lo tih a sawi. Congress emaw BJP pawh ni se sorkarna siam turin inremn an la siampui loh bakah, media-a party dang an thawhpui tura inremna an siam tawh anga tarlan chu thu belhchian dawl lo niin a sawi ve thung. Hetihrual hian National People’s Party (NPP) chuan BJP an thlawp thu chu an party hruaitu, Conrad Sangma chuan Thawhṭanni khan a puang. NPP hian Congress an thlawp anga tarlan chu thu belhchian dawl lo niin a sawi.

Conrad Sangma chuan, “Congress thlawpna lehkha Governor hnena theuhluh-ah khan party president chuan hming a ziak lo a, MLA leh president-te'n hming an ziah hnanna lehkha kha khawi aṭanga lo chhuak nge kan hre lo" a ti. Congress an thlawp loh thu leh, BJP an thlawp zawk thu chiang takin a sawi. Media lamah NPP-te'n Congress an thlawpna lehkha ziak hi tarlan a ni a, hei hian sawizui a hlawh hle. Manipur Chief Minister Okram Ibobi Singh leh Congress hruaitu ṭhenkhatte chuan he lehkha hi Governor hnenah thehluh a ni a, NPP aiawha thehluh nia tarlan a ni.

Tuna a landan chuan, Assam leh Arunachal Pradesh-te hnung zuiin, Manipur-ah hian a ṭum khatnaa tan BJP a sorkar ngei dawn nia ngaih a ni. Hun reiloteah sorkar thar a din thuai beisei a ni a, hetih rual hian thu thang a tam avangin official-a puan a nih hma loh chuan sorkarna siam tur hi a chiang lo a ni.