Manipur Chief Minister thar tur footballer Biren

Manipur-a sorkar din mai tura ngaih BJP chuan chief minister atan foot-baller hlui, Nongthombam Biren Singh chu Thawhṭanni khan an thlang. Biren Singh hi footballer hlui anih bakah, hun eng emaw chen journalist lo ni tawh a ni a, Congress kaihhruai sorkar-ah minister nihna lo chelh tawh a ni bawk.

Kum 56 mi, Biren Singh hian nikum October thla khan Congress party chhuahsanin BJP a zawm a, politics-a sulhnu nei ngah tak a ni. Football a khelh laiin BSF tan a khel ṭhin a, chief minister atana lakluh a nih chuan India rama footballer zinga CM ni thei hmasa ber a ni ang. Heingang constituency aṭanga thlan tlin a ni a, he bialah hian BJP-in hnehna an chan vawi khatna a ni. Football khelh a chawlhsan hnu hian journalism lamah a lut a, daily newspaper, Naharolgi Thoudang a enkawl ṭhin. Biren chuan, "Mipuite tana nasa zawka hna ka thawh theih nan journalism ka bansan a, politics-ah ka zuanglut ta a ni. MLA nih ka tum ṭhin a, tunah chuan chief minister hial ni thei tura ka awm tak avang hian ka lawm hle a ni" a ti.

Biren hi chanchinbu a enkawl laiin 'father of social worker' an tih Thounaojam Iboyaima-a thusawi alo tihchhuah avangin man a ni a, hei vang hian jail-ah tan tir a ni. April 14, 2000 khan man a ni a, Iboyaima pawh a thusawi avangin man a ni a, an pahnih hian jail-ah tan tir an ni. May 2003 khan Congress party a zawm a, minister of state for vigilance tan ruat a ni. Kum 2007 election-a thlan tlin a nih hnuah irrigation and flood control minister bakah youth affairs and sports a enkawl. Congress sorkarah hmun pawimawh chang chho mah se party inrelbawl danah a lungawi loh avangin nikum Octo­ber khan party-a a nihna te hlipin, a chhuak zui a, BJP a zawm ta a ni.

Tunah hian BJP state election management committee-ah dinhmun pawimawh tak chelhin, party thupuangtu a ni bawk.