Manipur : Governor-in sorkar siam turin BJP sawm ; Chief Minister atan N Biren lalut

Manipur Governor Najma Heptulla chuan Bharatiya Janata Party (BJP) chu sorkarna siam turin Thawhlehni khan a sawm a, chief minister atan Nongthombam Biren chu nimin khan lakluh nghal a ni.

Heptulla chuan, "Manipur hian hmasawn­na a mamawh a, ṭhalaiten hna thawh tur an mamawh a ni, chu mi tur chuan sorkar ṭha tak a din an ngai a, BJP chu sorkar ngialnghet leh ṭha din turin an ṭha tawk" a ti. Nongthombam Biren Singh chu nimin khan rinawmna thu tiam tirin Manipur Chief Minister atan lakluh a ni a, a rual hian minister pariat te chu lakluh an ni bawk.

Chief Minister lakluh inkhawm hi BJP president Amit Shah, Assam Chief Minister S. Sonowal, Assam Finance Minister Hemanta Biswa Sarma leh BJP hruitu lawk eng emaw zatin an telpui. Sorkar thar hian thlawpna a nei ṭha tawk em tih chu March 22 emaw 23 hian fiah a ni dawn.

Deputy Chief Minister atan National People's Party (NPP) MLA Y Joykumar Singh chu lakluh a ni a, Lok Janshakti Party MLA Karma Shyam leh Trinamool Congress MLA Robindro Singh-te pawhin BJP an thlawp a, an pahnih hian minister-ah dah an ni. Minister pariat lakluh thar zingah hian BJP pakhat chiah awmin, a dang zawng chu an thawhpui party-te mi leh sa te an ni. BJP minister Thongam Biswajit Singh chu dinhmun pawimawh tak pek a nih rin a ni. NPP MLA pali zinga pahnih chu minister atan lakluh an ni a, NPF MLA pali zinga pathum chu minister atan ruat an ni bawk a, Congress MLA hel Thounaojam Shyamkumar pawh rinawmna thu tiam tir a nih hnuah BJP-ah lawmluh a ni bawk.

Hetih lai hian Congress chuan BJP kaihhruai sorkar din a nih danah thil dik tawk lo a awm tih sawiin, Supreme Court-ah an zualko tur thu an sawi. Goa-ah pawh BJP hian Congress aia seat la tlem chungin sorkar an din a, Congress party chu SC-ah hian an lo zualko tawh bawk a ni. Congress hruaitu Okram Ibobi Singh chuan Thawhṭanni khan Governor ngenna angin Chief Minister a nihna aṭangin banna a thehlut a ni.

Biren Singh

F Kum 56 mi niin, Congress sorkar-ah minister a ni ṭhin a, nikum October khan BJP a zawm.

F A hun hmasa lamah Football a khel ṭhin a, BSF tan a khel ṭhin.

F Football a chawlhsan hnuah chanchinbu a enkawl a, Naharolgi Thoudang-ah editor a ni.

F April 14, 2000 khan social worker Thounaojam Iboyaima-a thusawi chanchinbuah a tihchahuah avangin jail-ah a tang.

F May 2003 khan Congress party a zawm a, minister of state for vigilance atan ruat a ni.

F Kum 2007 election-ah MLA atan thlan tlin a ni.

F Manipur Assembly Election 2017-ah BJP ticket-in thlan tlin a ni.

F March 15 2017-ah Chief Minister atan lakluh a ni.

F India rama footballer zingah CM ni thei hmasa ber a ni.

F Biren Singh hian kum 1981 khan Border Security Force team chu Durand Cup-ah a lo champion pui tawh a ni.