Bodo-te'n lungawi lohna lantir zel tum

Assam-a cheng Bodo hnamte chuan state hran pek phuta sorkar laka lungawi lohna an lantir chu chhunzawm zel an tum thu an tarlang.

Assam-ah hian Bodo-te hi mi nuai 60 chuang zet an awm a, state hran pek an ngiat avangin vawi eng emaw zat lungawi lohna an lo lantir tawh a ni. March 10 aṭang khan sorkar laipui leh state sorkar-te chu state hran an ngiat chungchang ngaihtuah tura phutin chaw nghei an kalpui a, an thil phut a hlawhlin hma loh chuan hma lak zel an tum. Sorkar chuan a enhran thu an sawi a, Bangladesh leh Pakistan mi ana maia ngaih an nih thu an sawi. Hei hi an duh loh hle tih an sawi a, state hran pek an phut a ni.

All Bodo Students Union (ABSU) President Pramod Bodo chuan, Assam-ah boruak muan­awm a awm an duh tih sawiin, hetih rual hian an thil phutte chu tihhlawhtlin a nih loh chuan na zawka sorkar nawr an tum tih a sawi. Assam Chief Minister Sarbananda Sonowal chuan Thawhṭanni khan chaw ngheia sorkar nawr mektute chu an nawrh titawp turin a lo ngen tawh a, mahse sorkar lamin an thil phut a tihhlawhthin mai loh avangin chaw nghei hi an kalpui zui a ni.

Chaw ngheia nawrh huaihawt hi All Bodo Students Union (ABSU), National Democratic Front of Bodoland-Progressive (NDFB-P) leh People’s Joint Action Committee for Bodoland Movement (PJACBM)-te bultuma neih a ni.