Manipur CM thar Biren-a'n NH dan tihtawp a tiam

Manipur Chief Minister thar N. Biren Singh chuan, United Naga Council (UNC)-te'n tiamchin awm loa National Highway (NH) an dan chah mek tihtawp chu a ngaih pawimawh hmasak ber a nih thu a sawi.

Biren Singh hi Nilaini khan CM atan lakluh a ni a, a rual hian minister pariatte pawh lakluh an ni. Biren chuan Raj Bhavan-a thuthar thehdarhtute a kawmnaah, UNC-te'n Manipur chakkhai lamna kawngpui pawimawh tiam chin awm loa an dang chu a ngaimawh takzet tih sawiin, hemi titawp tura hmalak chu a hna hmasa ber tur leh ngaih pawimawh ber a nih thu a sawi. UNC-te hian kum 2016 November 1 aṭang khan, Congress sorkarin Sadar Hills leh Jiribam-te district-a hlangkai tura thutlukna a siam duhlohna lantirin NH hi an dang chat a, tun thlengin an la kalpui a ni.

Assembly election neih hma khan Bharatiya Janata Party (BJP) chuan NH dan chah tihtawp chu campaign auhla ber pakhatah an nei a, sorkarna an chan aṭanga darkar 48 chhunga hlih an tiam a ni. BJP kaihhruai sorkar a ding ta chiah a, CM Biren chuan hma an lak nghal tur thu a puang a ni. Hetih lai hian UNC-te hian an thil phut tih hlawhtlin sak an nih loh chuan NH danchah chu kalpui zel an tum thu an lo sawi tawh a ni.

Assam CM-in Manipur duhsakna hlan

Assam CM Sarbananda Sonowal chuan Manipur-a BJP sorkar a ding thei ta chu lawmawm a tih thu sawiin, sorkar thar duhsakna a hlan. Sonowal hian BJP sorkar thara chief minister Bioren-a lakluh inkhawm a hmanpui a, duhsakna a hlan a ni. Assam CM chuan Prime Minister Narendra Modi-a kaihhruaina hnuaiah ramin nasa taka hma a sawn thu sawiin, Manipur pawhin hmasawnna kawng a zawh ṭan dawn niin a sawi. Assam leh Manipur-te chuan hmalam pan turin hmabak duhawm tak an nei tih sawiin, hmarchhak state dang Meghalaya, Tripura leh Mizoram-ahte pawh BJP sorkar a din chhoh zel a beisei thu a sawi.

CM Sonowal chuan, Asam mipui­ten Congress sorkarah rinna an nghat ngam tawh lo a, kum 15 zet ro an rel tawh hnuah mipuiten an hnawl a ni tiin, chutiang bawkin Manipur-a kum 15 zet rorel tawh Congress sorkar chu mipuiten hnawlin BJP sorkar a ding thei ta ni, a ti. Hei hian mipuiten hmasawnna tluantling an duh zia a ti lang a, a lawmawm takzet a ni, a ti.

Hmarchhak state - Assam, Aruna­chal Pradesh te hnung zuia Manipur-a BJP kaihhruai sorkar ding chuan mipuite tan hna ṭha taka an thawh a beisei thu a sawi.

Congress MLA-in BJP zawm

Congress MLA T. Shyamkumar chuan tun hnai khan BJP a zawm a, Nilaini khan minister atan lakluh a ni. Shyamkumar hi Andro constituency aṭangin Congress ticket-a thlan tlin ani a, result puan a nih hnuah BJP a zawm a ni. Hemi chungchangah hian Congress state unit chief T.N. Haokip chuan, "Shyamkumar hian party remtihna leh hriatpuina loin party a chhuahsan a, kum ruk chhung atan hnawhchhuah a ni” a ti. India danpui 10th Schedule hnuaiah hremna pek a nih tur thu a sawi bawk.

Chief minister hlui leh Congress party hruaitu Ibobi Singh chuan, Shyamkumar chungchangah hian sawi tur a nei lo tih sawiin, amah zawt mai turin ngenna a siam. Hetih rual hian party a chhuahsan danah party phalna leh remtihna loa chhuak a nih avangin a chungah hremna lek a nih tur thu leh, a chet dan chu dankalh a nih thu a sawi. Congress party chuan sorkarna siam tura sawm ni lo mah se, Ibobi Singh chuan chanvo pawimawh tak an chang dawn tih a sawi.