Rohingya leh Bangladesh mi hruailuttu Mi 6-te NIA-in thubuai a siamsak

National Investigation Agency (NIA) chuan Assam leh Meghalaya state ami, mi parukte chu document lem hmanga India rama Rohingya leh Bangaladesh hmeichhiate hruai luhnaa inhnamhnawiha puhin thubuai a siamsak.

Inrinni liam ta khan NIA hian Guwahati-a NIA special court-ah chargesheet a thehlut a ni.

Nimina thuchhuah an siamah, NIA chuan, "Thil awmdan chhui hnuah, heng mite hi India leh Bangladesh rama midangte nena inthurualin, Rohingya/Bangladesh hmeichhia, kum tling lote India rama lakluhna, human trafficking-ah an inhnamhnawih tih hriat a ni. Heng mi parukte hian document lam an lo siamsak bakah, an kalna leh awmna turte pawh an lo ngaihtuahsak a ni," a ti. IPC Section 120B, 370(3) leh 370(5) hnuaiah thubuai hi siamsak an ni.

Thubuai siamsak mi paruk zinga pangate hi Assam-a Cachar district mi an ni a, pakhat hi Meghalaya-a East Jaintia Hills district-a mi a ni. Kumin March thla khan an paruk hian man an lo ni tawh.

Nikum December thla khan NIA hian Assam-ah document nei lo chunga Rohingya raltlan lut eng emaw zat man an nih avangin, mihringa sumdawnna atana Rohingya leh Bangladesh mi hruailuh chungchang hi a buaipui zui a ni.