Manipur : UNC-te'n NH dang chhunzawm zel

Manipur Chief Minis­ter thar N. Biren Singh chuan United Naga Coun­cil (UNC)-te chu Natio­nal highway (NH) an dan­chah mek titawp turin ngen mah se, an la kalpui chhunzawm zel.

Biren Singh chuan UNC-te chu Manipur chak­khai lamna kawngpui pawimawh NH-37 tiam­chin awm loa an danchah mek titawp turin a ngen a, mahse UNC-te chuan an thil phut a hlawhtlin hma loh chuan tawpsan an tum loh thu an sawi. Biren hi Nilaini khan CM atan lakluh a ni a, thuthar thehdarhtute a kawmna hmasa berah NH danchah tihtawp a nih theih nana hmalak chu a ngaih pawimawh hmasak ber a nih thu a lo sawi tawh a ni. Assembly election campign lai pawhin BJP chuan sorkarna an siam a nih chuan NH danchah tihtawp nghal a nih tur thu an lo sawi tawh a ni. Prime Minister Narendra Modi ngei pawhin sorkarna an chan aṭanga darkar 48 chhunga an tihtawp nghal tur thu a lo sawi tawh bawk.

Hetih lai hian UNC-te chuan sorkar laka an thil phut chu a la ngai reng tih sawiin, a hlawhtlin hma loh chuan NH dan zel an tum thu an sawi. UNC-te chuan an thil phut chungchangah hian sorkar aṭanga inbiakna nei tura sawmna an la dawn loh thu sawiin, NH dan chu kalpui zel turin thutlukna an siam tih an sawi. An thil phutte chu inbiakna hmanga chinfel an duh tih an sawi bawk. UNC-te hian Naga-te chenna hmun ṭhenkhat sorkarin district-a a hlangkai chu sut leh an phut a, hei bakah hian Sidar Hill chu district-a hlangkai lo turin sorkar an nawr bawk.

Congress kaihhruai sorkar chuan kum 2016 khan Jiribam leh Sadar Hills-te chu district-ah hlangkai turin thutlukna a siam a, hei hi UNC-ten chuan duh loin, hmasang aṭanga Naga-te chenna a nih avangin district-a hlankai an remti lo a ni. Hei bakah hian nikum December-a sorkarin district thar pasarih a din chu nasa takin an dodal bawk. November 1, 2016 aṭang khan UNC hian tiam­chin awm loin NH-2 leh NH-37 te an dang chat a, NH-2 hi chu hawn leh tawh a ni a, NH-37 erawh tun thlengin khar a la ni. Hei hian nasa takin nitin mamawh lakkhawm kawngah nghawng neiin, thil man a san bakah, oil leh thil dangte duh ang tawk lei tur a awm lo a ni. Oil a harsat avangin vahvelna a buai phah a, hun eng emaw chen chu zirna-in te pawh khar lailawk a lo ngai tawh bawk.

Manipur-ah hian kar khat chhungin truck 900 vel chuan venhimna hnuaiah bungrua an phurlut ṭhin a, hei hian harsatna tawh zual­pui a sukiang a ni. Hetih lai hian kawng lakah truck-te hian beih an tawk fo a, venhimna khauh taka kenkawh ni mah se tharum thawhna leh inlambunna a theng fo a ni. Lirthei eng emaw zat hal a ni tawh a, nunna chan pawh an awm tawh bawk. Sorkar laipui chuan venhimna hna thawk turin central paramillitary force ṭhahnem tak a tirlut tawh bawk a ni.