Meghalaya sorkar sum indaih lohna vbch 1,236

Meghalaya Chief Minister Mukul Sangma chuan kum 2017-18 atana state budget chu Nilaini khan a pharh a, sorkar sum indaih lohna chu cheng vaibelchhe 1,236 a ni.

Finance changtu Sangma chuan, kum 2017-18 atan sorkar laipui aṭanga sum hmuh tur zat chu cheng vaibelchhe 12,510 a nih thu sawiin, revenue receipt aṭanga sum hmuh tura beisei chu cheng vaibelchhe 11,280 leh, capital receipt aṭangin cheng vaibelchhe 1230 beisei a ni, a ti. Sangma chuan National Highway (NH) kama Supreme Court-in zu zawrh khapna a tihchhuah chuan, chhiah lakluh kawngah nasa taka nghawng a neih thu sawiin, Nation Green Tribunal (NGT)-in state chhunga lungalhthei laihchhuah leh, thawnchhuah kawnga khapna a siam chuan a chhiah a nghawng nasat thu a sawi bawk.

Chief Minister chuan, sorkar kum thar atana state Gross State Domestic Product (GTS) chu cheng vaibelchhe 29,566 a tlin beisei a nih thu sawiin, kum kalta aiin 10.55%-a a pun beisei a ni, a ti. Tun dinhmuna state mipui sum lakluh chawhrual chu mi pakhatah cheng 88,497 a nih thu sawiin, hei pawh hi a pun chhoh beisei a ni, a ti. Goods and Services Tax (GST) chuan chhiah lak kawngah state sum lakluh a tihpun a beisei tih a sawi bawk.

Meghalaya sorkar hian deve­lopment project atan cheng vaibelchhe 1731.57 a ruahman a, 2016-17 chhung Education tih­hmasawn nana sum dah vaibelchhe 677 chu vaibelchhe 909.94-ah tihpun a ni a, kawngpui sial nan leh lei dawh nana sum ruahman chu vaibelchhe 471.8 aṭangin, vbch 712.8 -ah tipung tura ruahman a ni. Hei bakah hian hriselna lam atan hmalakna tura sum ruahman chu cheng vaibelchhe 420.93 aṭangin, vbch 470-ah tihpun a ni bawk.