Manipur-a dan loa lutte venna tur Document siam turin state sorkar an phût

Manipur-a civil society group lian pahnih chuan an state-a dan loa lut ṭhinte venna turin sorkar chu National Register of Citizenship (NRC) ang chi document siam ve turin an phût.

Civil society group, Co-ordinating Committee on Manipur Integrity (COCOMI) leh United Naga Council (UNC) te chuan dan loa lutte hriatchhuah a, luh belh zel awm tur venna atan NRC ang document siam hi a ṭul tih an sawi a, hemi kawnga hma la turin sorkar chu an phût bawk.

Myanmar, Bangladesh leh Nepal aṭangin an state-ah ram dang mi, dan loa lut an tam hle tih sawiin, hei hian state chhung mipui dinhmun thlengin a nghawng a ni, an ti.

COCOMI leh UNC hian an thil phut chungchangah chief minister N Biren Singh hnenah memorandum an thehlut nghal a ni. Memorandum-ah Manipur leilung fate chuan danloa an state-a ram dang mi lut an pung zel chu an ngaimawh tawh hle tih sawiin, kum 1947 aṭang tawh khan Manipur-a ram dang mi lutte chu enfiah an ni ngai lo a, hei hian state ram chin, economy leh leilung fate dinhmun thlengin a tiderthawng thei a ni, tiin an ziak. Hei vang hian a leilung fa dik takte an hmalam hun tiderthawng thei thilte chu ngawi rengin an thlir liam thei tawh lo a ni, an ti.

"Pem lut an pung zel a, ram neitu nihna thlengin an chuh tawh a ni. A bikin hill district-a thingtlang khaw eng emaw zat an luah a ni. State sorkar chuan hma lak tum loin a lo en liam ringawt zel a, hei vang hian ram dang, a bikin Myanmar aṭanga dan loa rawn lutte awmna khua a pung zel a ni," tiin an sawi. Hetiang thil hi an thlir liam zel chuan state chhunga chi bing inkara thil duhawm lo leh buaina a chhuak thei mai dawn niin an sawi a ni.

Civil society group-te chuan hill district pangaah hian 'unrecognised village' a pung chak hle a, tunah hian 934 zet a awm tih an sawi. Hengte hi enfiah a, a ṭul anga hma la thuai turin sorkar chu an phut tih an sawi.