Assam-ah hna pek tiama mi 250 bumtu mi 3 man

Kokalta-a military intelligence official-te chuan Assam-a Cachar district-ah Inrinni liam ta khan mi 250-te bum a, health leh education department-a hna pek leh, Army unit hrang hranga thun tiamtu mi pathum an man.

Military intelligence team hian Silchar-a military base bulah mi bumtua puh mi pathum - Abdul Manan Laskar, Jitendra Sinha leh Krishna Prasad Sinha-te hi an man a, an kut aṭang hian pawisa fai Rs 51,700 bakah document eng emaw zat an man tel a ni.

Mi pathumten sorkar hna pek an tiam avanga sum petu, mi eng emaw zat an bumte chuan a pawisa pekte pe kir leh tura phutin Silchar-Masimpur kawngpui an dang a ni. Mi pathumte hi intelligence official-te chuan Silchar sadar police kutah an hlan a, Pathianni khan thubuai siamsak nghal an ni tih police official chuan a sawi.