Manipur : BJP kaihhrui sorkarin floor test paltlang Biren-a'n thlawptu 33 nei

Manipur-a Bharatiya Janata Party (BJP) kaihhruai sorkar chuan nimin khan floor test a paltlang a, MLA 33-ten Chief Minister Nongthombam Biren Singh an thlawp.

Assembly member 60 awmna­ah hian MLA tam zawkin Biren Singh an thlawpna an lan tir a, Manipur-ah BJP kaihhruai sorkar a ding dawn tih a chiang ta a ni. BJP MLA Yumnam Khemchand Singh chu nimin vek khan assembly speaker atan ruat a ni. March 15 khan Biren Singh hi Manipur CM atan rinawmna thu tiam tira lakluh a ni a, a rualin minister pasarih lakluh an ni bawk. Hetih lai hian BJP kaihhruai sorkar-ah hian BJP chuan minister pahnih chauh an nei a, a dang zawng chu an thawhpui party mi leh sa te an ni. National People's Party (NPP) chuan minister pali neiin, Naga People's Front (NPF)-in pakhat, Lok Janshakti Party (LJP) pakhat leh Congress aṭnga BJP zawmtu te chu minister-ah dah an ni.

BJP hian party malin seat 21 chauh la mah se, party dang NPP, NPF, LJP, Trinamool Congress leh Independent MLA-te thawhpuiin, sorkar an din a ni. BJP hian kum 2014 state assembly-ah khan seat khat mah an la lo a, kumin inthlanah erawh nasa taka hma sawnin, seat 21 an la a, an ni aia seat la tam Congress sorkar an paihthla thei a ni. Congress party hian seat 28 laiin party mala seat la hnem ber ni mah se, sorkarna siam tura party dang thlawptu a neih loh vangin kum 15 chhung zet ro an rel tawh hnuah paihthlak an ni ta a ni.

Hetih lai hian assembly member mi 60-te chu Pathianni khan lakluh an ni. Governor Najma Heptullah-i chuan inkhawm a kaihruai a, Raj Bhavan-ah rinawmna thu tiam tira lakluh an ni.