District ṭhiah leh kan remti lo : MPCC

Manipur Pradesh Congress Committee (MPCC) chuan kum 2016-a Congress sorkarin district thar pasarih a lo din tawhte chu ṭhiah leh an remti lo tih an sawi.

Chief Minister hlui Okram Ibobi Singh chuan, "Congress sorkarin district thar pasarih a lo din tawh, BJP kaihhruai sorkarin ṭhiah tuma hma a la hi kan dem takzet a, eng tikah mah district ṭhiah leh hi kan remti ngai lo ang" a ti. District thar din chu state inrelbawlna ṭha leh mumal zawk a awm theih nana tih a nih thu a sawi. BJP-in sorkarna an chan chuan United Naga Council (UNC)-te'n tiam chin awm loa National Highway (NH) an dan chah tihtawp an tiam a, sorkarna chang lo se titawp turin hmalak an tum lo em ni? tiin, sorkar laipuia BJP hruaitute chu zawhna a zawt bawk.

Ibobi Singh chuan, BJP hian politics-a hamṭhatna an hmuh nan leh sorkarna an siam theih nan chauh thu an tiam a, hei hi democracy palzutna lian tak a ni, a ti. State mipuite harsatna tawh sutkian tum tak tak lo leh, politics-a hamṭhatna an chan theih nan chauha hmalak tumah BJP a puh. Hei bakah hian BJP leh UNC-te chu inthurualah puhin, Naga hel National Socialist Council of Nagaland - Isak-Muivah te pawh an ban bik loh thu a sawi.