Manipur : UNC-te'n ni 139 hnuah NH dan titawp ta

United Nag Council (UNC)-te chuan nikum November 1 aṭanga tiam chin awm loa Manipur kalpawhna kawngpui pawimawh National Highway (NH) an dan chah chu Pathianni zan aṭanga khan an tihtawp thu an puang ta. UNC-te hian Manipur chakkhai lamna kawngpui pawimawh hi ni 139 chhung zet an dang a ni.

Ministry of Home Affairs, Manipur sokar aiawh leh UNC hruaitute chuan Pathianni khan Senapati district-a DC office-ah inbiakna an nei a, inremna an siam thei ta a ni. Inbiakna hi MHA Joint Secretary kaihhruaina hnuaiah neih a ni a, inbiakna neih zawh hnu hian NH dan tihtawp a nih thu hi official-a puan nghal a ni. UNC-te hian an hruaitu pahnih, police custody-a dah president Gaidon Kamei leh publicity secretary Shangkhel Stephen-te chu sorkarin chhuah a remtih hnuah thutlukna an siam tih an sawi. State sorkar chuan NH dan a nih avanga UNC an mi leh sa thubuai nei mek te chu sorkarin ngaihdam a tiam tih an sawi bawk.

Naga zirlai pawl All Naga Students’ Association Manipur (ANSAM)-te chuan inremna siam a ni ta chu lawm­awm an tih thu an sawi a, Naga Women Union (NWU) pawhin lawmawm an tih thu an sawi. UNC General Secretary S. Milan chuan NH danchah titawp tura inremna sdiam ni tawh mah se, an thil phut chungchangah state sorkar nen political level inbiakna neih chhunzawm leh a nih tur thu a sawi. UNC-te hian Naga-te chenna Sadar Hills chu district-a hlangkai lo turin sorkar an phut a, hei bakah hian Jiribam leh district dang paruk sorkarin a din chu ṭhiah leh an phut a ni. Kum 2016 khan Congress kaihhruai sorkar chuan Sadar Hills leh Jiribam-te chu district-a hlangkai turin thutlukna a siam a, hei bakah hian district thar pasarih a din bawk, hei hi UNC-te chuan nasa taka dodalin NH an dangchat a ni.

UNC-te hian a tirah NH-2 leh 37 an dang chat a, nawrna nasa tak avangin NH-2 an dan chu an titawp a ni. NH dan a nih vang hian nunphung a buai phah hle a, oil leh bungraw phur lirthei ṭhahnem tak chu kawng lakah an tangkhang a ni. Heng lirthei tangkhangte hi venhimna hnuaiah Manipur panpui ṭhin an ni a, kawng lakah lambun an ni fo. Kawngpui dan a nih chhung hian lirthei hal eng emaw zat a awm a, thi leh hliam pawh an awm a ni. State sorkar chuan titawp tumin hma a la reng a, sorkar laipui pawhin central paramilitary force a tir lut. Heti chung hian dan leh thupek kenkawh mumal theih a ni lo a, Court pawhin state mipuite himna ngai pawimawh tur leh, khauh zawka dan leh thupek kengkawh turin state sorkar a hriattir a ni. He thil thleng avang hian mipui nawlpuiin harsatna an tawk a, thil man a sang hle bawk.

Oil-ah harsatna nasa tak a thlen avangin ṭhenawm state aṭanga chawkluh a ngai hial a, a man a to hle bawk. Oil harsatna avang hian lirthei neituten harsatna an tawk nasa hle a, zirna-in te pawh hun eng emaw chhung chu khar a ngai hial a ni. Eelection Commission of India chuan Manipur dinhmun a zir chian hnuah, UNC-te'n NH dang chat mah se assembly election nei turin a ti a, March 11 khan result puan a ni. BJP-in ṭangrual sorkar an din hnuah, chief minister atana lakluh N. Biren Singh chuan NH danchah tihtawp chu a ngaih pawimawh hmasak ber a nih thu a sawi. Sorkar laipui hmalaknaa remna zawnga inbiakna neih a nih hnuah, BJP kaihhruai sorkarin UNC-te thil phut tihhlawhtlin a tiam tak avangin UNC-te chuan thla li chuang zet kawngpui an lo danchah tawh chu tihtawp an remti ve ta a ni.