Manipur : Truck leh Oil Tanker-te'n Imphal an thleng

Manipur chakkhai lamna kawngpui pawimawh hawn a nih hnuah, Thawhṭanni aṭang khan truck leh oil tanker-te chuan state khawpui Imphal an thleng ṭan.

United Naga Council (UNC)-te'n ni 139 chhung zet National Highway (NH) an danchah chu Pathianni zan aṭang khan sorkar nen inremna an neih tak avangin tihtawp a ni. NH hawn a nih aṭang hian bungraw phur truck-te chuan Manipur an thleng tawh a, hei hian mipuiten nitin mamawh lakkhawm kawnga harsatna an tawh te a sutkian chhoh rin a ni. Oil tanker ṭhahnem tak chuan Imphal an thleng tawh bawk. NH hawn a nih tak avang hian thil man sang pawh a tlakhniam nghal a rinawm a, mipuiten hun rei tak chhung harsatna an tawh chuan ziaawm lam a pan chhoh thuai beisei a ni.

Truck khalhtu O. Ramesh chuan, Assam ṭhenawm Jiribam district-ah ni tam tak chhung an tangkhang tih sawiin, NH hawn a ni ta chu lawmawm a tih thu a sawi. Official-te chuan truck tlan chhuah dan tur an ruahman a, a indawtin tlan chhuah a ni, a ti. Hetih lai hian iron rod phurte chu din tir an la ni a, hun reiloteah Imphal an pan theih a rinawm tih a sawi bawk.

Manipur Chief Minister N. Biren Singh chuan, hun rei tak chhung mipuite chunga tawrhna thleng chu pawi a tih thu a sawiin, UNC-te'n sorkar ngenna ngai pawimawh a NH dan chah an tawpsan chu thil lawmawm tak a ni, a ti. Bharatiya Janata Party (BJP) kaihhruai sorkar chu mipuite tan an= ding zel dawn tih sawiin, tun hnuah chuan NH dan chah leh, mipuite harsatna thlen zawnga sorkar nawr nan lungawi lohna lantir thleng tawh lo se a duh thu a sawi bawk.

Hetih lai hian Chief Minister hlui Okram Ibobi Singh pawhin UNC-te'n mipuite harsatna tawh hrethiam chunga kawngpui dan an titawp chu lawmawm a tih thu a sawi ve bawk. UNC-te thutlukna chuan a tihlim tak zet tih sawiin, state mipuite harasatna sutkian a ni ta chu thil ropui tak a ni, a ti. UNC-te hian Ibobi Singh-a kaihhruai Congress sorkarin district thar a din vanga lungawi lohna lantirin, nikum November 1 ṭang khan NH hi an dang chat a, sorkar nen inremna an siam thei lo. BJP kaihhruai sorkar a din hnuah erawh inbiakna tluang taka neih a ni a, inremna siam a ni ta a ni.