BSF-te'n civil mi pathum thih dan chhui dawn

Border Security Force (BSF) official chuan, tun hnaia Tripura-a civil mi pathum BSF silai hmehpuaha an thih chungchang chhui a nih tur thu a tarlang.

BSF Deputy Inspector General Hardeep Singh chuan, he thil thlen dan kimchang hi chhui a ni dawn a, BSF Udaipur (southern Tripura) sector chuan hma an la dawn tih a sawi. Hemi chungchang hi Court-ah thlen a ni dawn a, thil thlen dan kimchang hriat theih thuai beisein a ni, a ti.

March 17 khan Southern Tripura-a Chittabari khuah civil mite leh BSF-te inkarah buaina a chhuak a, civil mi pathum kah hlum an ni a, an zingah hian hmeichhia pakhat a tel a ni. He thil hi India-Bangladesh border-a thleng niin, BSF-te chu dan loa Bangladesh aṭanga bawng tawlh luh veng tura an kal chu a kianga khaw mite nen an intibuai ta a ni.

BSF-te hian Chittabari khuaa mi ṭhenkhat chuan lo tibuaiin, an beizui mai niin an sawi. Civil mite chu inthunun tura an ngen hnuah pawh, beih an tawh zui zel avangin silai an hmetpuak ta mai niin an sawi. Hetih lai hian civil mite chuan BSF-te hian hmeichhe tleirawl pakhat chu khawih an tum niin an sawi a, chhan an tumna lamah buaina a chhuak zui ta mai niin an sawi thung. He thil thleng duh lohna lantir hian nawrh huaihawt a lo ni tawh a, chhui chian an phut thu leh, thil sual titu chu dan anga hrem an phut thu lungawi lote chuan an auchhuahpui a ni.

BSF Additional Director General (Eastern Command) R.P. Singh chuan kar tir khan he thil thlenna hmun hi a tlawh a, Tripura sorkar mi pawimawhte nen inkawm hona an nei bawk. Tripura Home Department official chuan, BSF hotute leh Chief Minister Manik Sarkar leh Chief Secretary Sanjeev Ranjan leh Director General of Police K. Nagaraj-te chuan he thil thleng chungchang hi an sawiho tih a sawi. Sarkar chuan BSF hotute chu pawikhawitue man chhuaka hremna pe ngei turin a phut niin a sawi.