Dalai Lama-a'n Assam leh Arunachal tlawh dawn

Tibetan sakhaw puithiam Dalai Lama chuan April thla khian Assam leh Aruanchal Pardesh a tlawh dawn.

Dalai Lama hian Ulaanbaatar-a Gandan Tegchinlen monastery a tlawh dawn a, Assam khawpui Guwahati-ah hun a hman zawh hnuin, Arunachal a pan leh dawn a ni. AP-ah hian Buddhist sakhaw zuitu an pun zel theih nan hma ala dawn a ni. April 1-ah Guwahati-a Assam Tribune Platinum Jubilee lawmnaah thu a sawi dawn a, a tukah IIT Guwahati-ah thu a sawi leh ang. A lehkhabu ziah Assamese ṭawnga leh “My Land and My People” chu a tlangzarh nghal dawn a ni. April 5-7 chhung hian Arunachal Pradesh-a Tawang-ah hun a hmang dawn a, Yiga Choezin-ah hun a hmang bawk ang. April 10-ah Thupsung Dhargyeling Monastery a tlawh ang.

Hetih lai hian China chuan Dalai Lama-a'n hmarchhak state a tlawh tur hi na takin a lo sawisel tawh a ni. Aruanchal-a Tawang a tlawh tur thu hi nikum khan puan a ni a, China hian a helh hle a ni. Sorkar laipui chuan Dalai Lama hi ram chhungah a duhna hmun tlawh a phalsak thu a lo puang tawh a, hei pawh hi China chuan sawiselin, ram pahnih inkar tichhe thei thil niin a sawi. China hian Tibet hi a ram bung pakhatah a chhiar a ni. Arunachal-a Tawang hi India leh China inri-na bula awm a ni a, Tibetan sakhaw puithiamin tlawh a tum chungchangah hian ram pahnihte hi an lo inkhak tawn tawh a ni.

Dalai Lama hian kum 1959 khan Tibet chhuahsanin, India ramah hun rei tak a khawsa a ni.