Manipur : UNC hruaitute thu delkilh awm loin chhuah

United Naga Council (UNC) presi­dent Gaidon Kamei leh information and publicity secretary SK Stephen-te chu Imphal East, Court of Chief Judicial Magistrate (CJM) chuan Thawhṭanni khan thu delhkilh awm loin a chhuah.

CJM Noutuneshwari Devi chuan Gaidon leh Stephen-te chuan dan bawhchhiat an neih loh avangin thu delhkilh awm loa chhuah an ni, a ti. An thubuai titawp tur hian March 27-ah inlan leh erawh a ngai dawn tih a sawi. Anni bakah hian UNC hruaaitu mi parukte chu an thubuai tihtawp sak an nih thu a sawi bawk. UNC hruaitute hi National Highway (NH) dan chungchangah mawhphurtuah puh an ni a, man an ni. Imphal West SP, N Herojit leh Advocate General Th Ibohal-te pawhin UNC hruaitute chhuah an nih thu hi an sawi ve bawk.

Hetih lai hian UNC-te hi Thawhṭanni khan Senapati-ah an pungkhawm a, an hma lak zel dan tur an sawiho. Manipur-a BJP kaihhruai sorkar a din hnua inbiakna neih a nih hnuah UNC-te chuan ni 139 chhung zet kawngpui an lo danchah tawh chu tawpsan an remti tawh a ni. State sorkar chuan UNC-te chu an thil phutte tihhlawhtlin sak a tiam a, police custody-a awm an hruaitute chu chhuah an remtih bakah, thubuai ziahluh dangte pawh tihtawp a remti a ni. Pathianni zan aṭang khan NH-37 chu hawn a ni ta a, dan pangngaiin lirthei an tlan leh tawh a ni.