Nagaland budget session Ṭan

Nagaland Legislative Assembly (NLA) budget session chu Thawhlehni khan ṭan a ni a, March 30 thleng a awh ang.

Governor, PB Acharya chuan session ṭanni hian thu a sawi a, sorkar policy leh program hrang hrangte a tarlan bakah, state-in hlawhtlinna a chan tawh hrang hrangte a tarlang. Governor chuan sorkarin hmachhawp a neih te sawi langin, Seventh Central Pay Commission hman a nih huna sorkar hnathawkte hlawh tihpun dan turte ennawn a nih tur thu a sawi. Pay commission hi hman a nih chuan sorkar hnathawk hlawh tihpun a nh dawn a, chu chuan state sorkar-ah sum indaihlohna a thlen theih avangin chhiah lak tipung tura ruahmanna siam a ni, a ti.

PB Acharya chuan Urban Local Body (ULB) election-a hmeichhe tana seat 33% hauhsak chungchang chu chinfel thuai tum a nih thu sawiin, pawl hrang hrangte pawh inbiakna neihpui an ni ang, a ti. Sorkar-in hmeichhe tana seat hauhsak tura thutlukna a siam duhlohna lantira nunna chan ta chhungte chu a tawrhpui thu a sawi. Indo-Myanmar border hungin ramri depa awmte tana harsatna a thlen te chu chinfel mek zel a nih thu sawiin, in leh lo chante chu in hmun pek an ni tawh a, pek loh chhungkaw tlem la awm te pawh pawh pek thuai an nih tur thu a sawi.

Naga hel pawl National Socialist Council of Nagaland - Isak-Muivah (NSCN-IM) chungchang sawiin, sorkar laipui nena inremna zawnga inbiakna neih a nih theih nan state sorkar chuan hma a la dawn tih Governor chuan a sawi. Kum 2015-a sorkar laipuiin NSCN-IM-te inremna a lo ziahpui tawh chu bawhzui a nih tur thu sawiin, inremna tluantling ziah thuai a beisei. Governor hian vawiin leh naktukah House-ah hian thu a sawi leh dawn a, Comptroller & Auditor General (C&AG) report chu March 24 khian pharh a ni ang a, Supplementary Demands for Grants (2016-2017) leh Demand for Grants (2017-2018) chu March 28 khian pharh a ni bawk ang.

Session ṭanni hian Dr. Imtiwapang Aier chu assembly speaker 17-na atan lungrual taka thlan a ni. Dr. Aier hi Mokokchung district-a Impur Constituency aṭanga thlan tlin a ni a, Ao hnam aṭanag speaker dinhmnun luah thei hmasa ber a ni. Chief Minister Dr Shurhozelie Liezietsu chuan member-te chu speaker atana ruat, Dr. Aier an thlawp avangin lawmthu a hrilh a, House zahawmna vawng nung zel turin duhsakna a hlan. Dr Aier hi Nagaland Legislators’ Forum-ah chairman ṭhin a ni a, hei bakah hian Parliamentary Working Committee chairman a lo ni tawh bawk.