Tripura-ah ONGC-te'n Gas tam zawk lakchhuah tum

Oil and Natural Gas Corporation (ONGC) chuan Tripura-ah gas tam zawk la chhuah tura hma an lak tur thu Nilaini khan an puang.

ONGC official chuan, tuna gas lakchhuah let hi kum nga chhungin lak chhuah tum a ni a, chumi tur chuan hmalakna kalpui mek a ni, a ti. Hemi atan hian project pawh duan a ni tawh a, hun reiloteah hna ṭan beisei a ni, a ti. ONGC hian Tripur-ah hian kum 2012-13 chhung khan gas cubic metre nuai 6,450 an la chhuak a, 2016-17 chhung khan cubic metre nuai 13,820 an la chhuak leh bawk. Hei hi khuma kum nga chhunga a leta tam lak chhuah tumin project an siam leh mek a ni.

Tripura-a power project hrang hrangah ONGC hian nitin gas cubic metre nuai 45 lakh an pe chhuak a, gas mamawhna hi a sang chho mek zel a ni. Kum 2015-16 chhung khan nitin power project atan hian gas cubic meter 49 an pe chhuak ṭhin. Power project-te hian gas an mamawhna a san chhoh zel avangin gas tam zawk la chhuak tur hian ṭan lak chhoh leh mek a ni. Western Tripura-a Sonamura-ah Gas Collection Station (GCS) din a ni a, heta ṭang hian gas hi pek chhuah a ni. GCS hi Southern Tripura-ah Gojalia-ah din leh tura ruahman a ni a, Agartala Dome-ah pawh din tura hmalak a ni a, kum 2019-ah chuan GCS-te hi zawhfel hman beisei a ni.

ONGC thupuangtu chuan, hmarchhak hmun hrang hrangah gas zawn hna hi thawh mek zel a ni a, hmun eng emaw zatah gas hi hmuhchhuah a ni tawh tih a sawi. Assam-a Jorhat district-ah gas laihchhuah mai theih tur a awm tih sawiin, hmun dangah pawh a awm nual niin a sawi bawk. Assam-ah hian Nazira, Jorhat leh Cachar bakah Silchar-ahte a zawn hna hi ngawrh taka kalpui a nih thu sawiin, Agartala-ah pawh zawn hna hi ṭan leh mek a ni, a ti.

ONGC hian kum 1972 aṭang khan Tripura-ah hian bul an ṭan a, gas khur 212 zet a awm tawh. Tripura-ah vek hian India rama commercial power project hmasa ber hawn a lo ni tawh a, hei pawh hi ONGC Tripura Power Company (OTPC) chuan an enkawl a ni. State sorkar chuan Infrastructure Leasing and Financial Services Limited (IL&FS)-te chu thawhpuiin hma an la a ni. Hei bakah hian Chambal Fertilisers and Chemicals Ltd, Rajasthan chu sorkarin a thawhpui bawk a ni.

Palatana-ah tui leh natural gas hmangin cycle power project din tuma hma lak mek a ni bawk a, hemi atan hian cheng vaibelchhe 5,000 ruahman a ni. Palatana power project aṭang hian hmarchhak state pasarih-ah power pek chhuah mek a ni. He hmun aṭang vek hian March 23 2016 aṭang khan Bangladesh tan power megawatt 100 pek chhuah ṭan a ni a, power tam zawk hralh chhuak turin hmalakna kalpui leh mek a ni. Hemi atan hian Tripura sorkar, sorkar laipui leh Bangladsesh sorkar te chuan inremna an siam tawh a, a taka kalpui thuai beisei a ni.