Union Cabinet-in hmarchhaka kawngpui siamna tur pawm

Union Cabinet chuan hmarchhak state Meghalaya leh Mizoram-a National Highway km 403 siamna tur chu Nilaini khan a pawm.

Prime Minister Narendra Modi chuan Cabinet Committee on Economic Affairs hi a kaihhruai a, kawngpui siamna tur hi sawiho a nih hnuah pawm a ni. Ruahman dan chuan Mizoram-ah km 351-a thui siam a ni dawn a, Meghalaya-ah NH km 52-a thui siam a ni bawk ang. Hemi atan hian cheng viabelche 6,721 ruahman a ni a, hetah hian ram leina tur leh thil dangte a tel a ni. Project hi kum 2017-18 chhungin kalpui hman tura tih a ni a, kum 2021-ah zawhfel hman tum a ni. North East Road Network Connectivity Project Phase I scheme hnuaiah kalpui a ni dawn a, two-lane-a siam tur niin, a senso hi Japan International Cooperation Agency aṭanga puk tur a ni.