TMC-in Tripura Files tichhuak

Trinamool Congress (TMC) party chuan Thawhlehni khan short documentary film, 'Tripura Files' a tichhuak.

He documentary film hi India ramin zalenna a hmuh aṭanga tun thlenga Tripura dinhmun, hmasawnna ṭhat tawk loh dan, sorkar inrelbawlna ṭhat loh dan leh state mipuite ngaihthah an nih dante tarlan a ni.

TMC Tripura state in-charge leh West Bengal minister hlui Rajib Banerjee chuan 'Tripura Files' hi episode tam taka siam a ni tih a sawi. "Left Front-in kum 35 chhung (1976-1998 leh 1993-2018) sorkarna an siam lai leh, BJP kaihhruai sorkar mekin thla 51 ro a rel chhungin, Tripura mipuite chu rahbeh niin, democracy rama tihdan ni lo thil a thleng fo a, tharum thawhna leh rawng taka beihnate an tawk fo a ni. Hengte hi 'Tripura Files' ah hian tarlan vek a ni ang," a ti.

Kum 2018, March thlaa Tripura-a BJP sorkar a din aṭang khan inthlan hrang hrang, a bikin local body election kalpui dan chu a fel tawk lo a, miputie chuan an hruaitu duh tak thlang turin vote pawh an thlak thei lo ṭhin a ni, tiin Rajib Banerjee chuan a sawi.

Abhishek Banerjee-a'n Meghalaya a tlawh dawn
Trinamool Congress (TMC) national general secretary Abhishek Banerjee chuan June 16 hian Meghalaya a tlawh dawn.

Meghalaya-ah hian nikum November thla khan chief minister hlui Mukul Sangma hoin Congress MLA 12 chu Trinamool Congress-ah a inlet a, assembly-ah eptu party lian ber an ni zui a ni. Mahse tun hnaiah an party MLA ṭhenkhat hi lungawi loin, rorellai National People's Party (NPP) leh United Democratic Party (UDP)-ah inpek an tum nia sawi thawm a awm a, hei vang hian TMC hruaitu hian tlawh a tum a ni. Abhishek Banerjee hian Meghalaya state a tlawhna hmasa ber tur a ni

West Bengal chief minister leh party hotu lu ber, Mamata Banerjee vahpa, Abhishek Banerjee hian party worker leh hruaitute a hmu dawn a, an party chhunga buaina awm pawh chinfel a tum a ni. Shillong-a TMC office a hawng nghal bawk ang.

TMC hian nakkuma Meghalaya assembly inthlan neih tura chak ngei tumin hma a la mek a, hmarchhak state hrang hrangah an dinhmun sawhngheh tumin an bei mek a ni. Banerjee hian May thla khan Assam pawh a lo tlawh tawh bawk.

UDP chuan eptu MLA ṭhenkhatin an biak thu sawiin, thutlukna erawh party thuneitu sang kuta an dah thu an sawi. Report ṭhenkhat chuan TMC MLA pathum/pali vel chuan an party chhuahsan a, nakkum assembly inthlan lo awm turah UDP ticket-ah din an tum niin an tarlang.