Manipur CM-in a ministry tilian

Manipur Chief Mi­nister Nongthombam Biren Singh chuan BJP kaihhruai ṭangrual sorkar chu tilianin, Ningani khan minister pathum a lakluh belh. Mi pathum lakluh belh nen hian minister 12 an awm ta a ni.

Minister thar pathum, V Hangkhalian, Nemcha Kipgen leh Th Radeshyam te Governor Dr Najma A Heptullah chuan rinawm­na thu a tiam tir a ni. Mi­nister pathumte hi BJP member vek an ni a, Nem­cha Kigpen hi member 60 awmna Assembly House-a hmei­chhe MLA awmchhun a ni.

Minister thar lakluh inkhawm hi Assam Finance Minister Hi­manta Biswa Sarma, Manipur CM hlui O Ibobi Singh leh RB Koijam, BJP state president Kh Bhabananda, MLA leh official dangten an telpui.

Ningani tlai vek khan CM Biren chuan CM Secretariat-a Cabinet Hall-ah Parliamentary Secretary atan mi 12-te chu rinawmna thu tiam tirin a la lut bawk. Parliamentary Secretary atana lakluhte chu L Sushindro, S Subhaschandra, L Rameshwar, N Indrajit, K Robindro, Th Seitabrata, H Dingo, Dr S Ranjan, Khasim Vashum, K Leishiyo leh Awangbou Newmai leh Md Ashab Uddin te an ni a, an zingah hian BJP MLA pariat, NPF MLA pathum leh independent MLA pakhat an tel.

CM chuan cabinet minister leh parliamentary secretary-te portfolio pawh tihfel thuai a ni dawn tih sawiin, government agency hrang hrangah chairman turte pawh puan thuai an ni ang, a ti.

Manipur-a BJP kaih­hruai sorkar hnuaia assem­bly hmasa ber chu March 20 khan ṭan a ni. Ṭangrual sorkar hi BJP, National People's Party (NPP), Naga People's Front (NPF), AITC leh Lok Janshakti Party (LJP) ten an siam a ni.