Bodo-te'n ṭap chungin sorkar an kar
Assam-a district hrang hrangah kar kalta Zirtawpni khan Bodo-te chuan state hran pek phuta sorkar kar nan a huhoa ṭah runpui an huaihawt.
All Bodo Students’ Union (ABSU), National Democratic Front of Bodoland-Progressive (NDFB-P) leh People’s Joint Action Committee for Boroland Movement (PJACBM)-te chuan he programmee danglam tak hi an buatsaih a, darkar thum chhung awhah hian hmeichhia ten lungawi lohna hi an lantir a ni. He hunah hian tel an ṭhahnem hle a, Rajya Sabha MP hlui Urkhao Gwra Brahma pawhin he hun hi a hmanpui a ni. UPPL vice president Pratibha Brahma chuan, ṭah runpui hi district headquarters zawng zawngah neih a nih thu sawiin, thlawptu an ṭhahnem hle a ni, a ti. Bodo-te state hran pek chu sorkar laipui leh state sorkar tih makmawh a ni a, chu mi tur chuan hma lak thuai a ngai a ni, a ti. Bodo-te chu Assam-a hnam lian leh hlun ber pakhat an nih thu sawiin, state hran pek an phut tih uar takin a sawi.
NDFB (P) general secretary Gabinda Basumatary chuan sorkar chhanna an nghah thu leh, inbiakna neih an duh thu a sawi. April 14 thleng sorkar an ngaihchan tur thu sawiin, hemi hnu hian an kal zel dan tur an rel dawn tih a sawi. An thil phut hi a hlawhtling lo a, sorakrin hma a la a nih loh chuan rel kawng leh motor kawngpui dan chah an tum. Basumatary chuan, darkar 1000 awh economic blockade huaihawt tum a ni a, hei hi a thlen loh nan leh mipuite chunga harsatna a thlen lohna turin, sorkar chu chak zawka hma la thuai tura an phut thu a sawi. Hemi chingfel tur leh hma la thuai turin Union Home Minister Rajth Nath Singah-a an phut tih a sawi bawk.
Rajya Sabha MP hlui Urkhao Brahma chuan, ABSU, NDFB (P) leh PJACBM-te hmalakna chu a thlawp thu sawiin, kum tak tak chhung Bodo-te thil phut tihkhawtlai a ni chu a dem tih a sawi. ABSU hruaitu Jayanta Basumatary pawhin, Bodo hnam an ral a nih loh chuan an thil phut chu an nawr zel dawn tih a sawi a, a tawp thlenga an nawr tur thu a sawi. Udalguri-ah chuan programme hi darkar li zet hman a ni a, tel an ṭhahnem hle. He hun hi ABSU president Pramod Boro leh NDFB (P) president Dhiren Boro-te chuan an hmanpui a, All Bodo Students’ Union pawhin an thlawp a ni.
Bodo-te hian Prime Minister Narendra Modi hnenah memorandum thehluh an tum thu an sawi bawk.