Left leh TMC party-in Assam-a PPE scam CBI chhuitir an phut

Assam-a eptu pawl, Left party - CPI, CPI(M), CPIIML) leh RCPI bakah Trinamool Congress chuan Assam chief minister Himanta Biswa Sarma nupui leh an ṭhianṭhate hnena PPE supply-na tur contract pek chungchanga chu Central Bureau of Investigation (CBI) chhuitir an phut.

Covid-19 hri len zual lai khan, kum hnih liam ta khan Assam CM nupui, Riniki Bhuyan Sarma leh sumdawnna lama an thawhpui ṭhianṭhate hnenah, PPE kit hi market rate aia toa supply-na turin contract pek nia sawi a ni.

Left party palite chuan thuchhuah inṭawm siamin, National Health Mission (NHM), Assam chuan heng contract pekna turah hian dan leh kaihhruaina awmte chu a palzut vek niin an sawi. "Media outlet pahnih - 'The Wire' leh 'The Crosscurrent'-ten an chhui chiannaah dik lo taka thil tih eng emaw zat an haichhuak a ni. Hei vang hian thu dik tak hriatchhuah a nih thuai thehna atan High Court enpuina hnuaiah CBI chhuitir kan phut a ni," a ti.

Trinamool Congress pawhin lungawi lohna lantirin Raj Bhawan-ah kawng an zawh a, mahse police-ten an lo dang a ni. TMC hian Assam governor Jagadish Mukhi kaltlangin prime minister Narendra Modi hnenah memorandum an thehlut a, CBI chhuitir an phut tih an sawi.

Memorandum an thehluhah hian, " Eirukna i ngaizam mai dawn lo tih sawi a, nangmah leh midangte pawh thamna lak i phal ngai dawn lo tih i sawi mek laiin, Assam-a BJP CM Himanta Biswa Sarma chu he thilah hian inhnamhnawiha puh mek a ni," tiin an sawi.

Dik lo taka contract pek nia puh chungchangah Sarma, a nupui Riniki Bhuyan Sarma leh state NHM-te chu an theih angin insawifiah mah se, eptu party leh state mipuite rilruah rinhlelhna a awm tho tiin an sawi bawk a ni.

Hemi hma hian Congress, Raijor Dal, Assam Jatiya Parishad leh Aam Aadmi Party pawhin CBI,ED emaw central agency dang emaw chu kum 2020-a BJP sorkar hmasaa Sarma health minister a nih laia PPE kit supply-na tur contract dik tawk lo taka pek nia sawi chu chhuitir an phut thu an tarlang tawh bawk.