Tripura Congress-i'n BJP sorkar hlawhchhamna tarlang

Tripura-a assembly constituency palia by-election nei tura inbuatsaih mek karah, Congress party chuan Nilaini khan BJP kaihhruai state sorkar hlawhchhamna hrang hrangte an tarlang.

Eptu party hian Agartala-a press conference an neihah BJP sorkar an puhna hrang hrang point 13 tarlangin, kumtin sorkar hnaah mi 50,000 lak a tiam na te, Tripura Tribal Areas Autonomous District Council (TTAADC) thuam chak a tiamnate chu a tihlawhtling lo tih an sawi.

Rorellai, BJP erawh chuan an puhna hi phain, June 26-a by-election result puan a nih hunah mipuite chhanna chu an hrechiang mai dawn a ni, an ti.

State Congress president Birajit Sinha chuan kum 2018 assembly inthlan neih dawn khan BJP chuan sorkar an siam chuan kumtin sorkar hna 50,000 lak thar an tiam a, mahse thla 52 an sorkar tawh hnuah pawh an la tihlawhtling lo tih a sawi. Hei bakah state sorkar hnathawkte tan 7th Central Pay Commission hman an tiam bawk a, hei pawh hi hman a la ni lo tih a sawi bawk. BJP sorkar chu state chhunga dan leh thupek kenkawh kawnga hlawhchhamah a puh bawk a ni.

June 23 hian Assembly constituency pali - Town Bordowali, Agartala, Surma leh Jubarajnagar-ah by-election hi neih a ni dawn a, June 26-ah result puan a ni ang. By-election-a chuh tur zingah hian chief minister nilai Manik Saha pawh a tel.