Meghalaya Assembly-in MLA hlawh a leta tihpun remti

Meghalaya assembly chuan Meghalaya Le­gislators Salaries and Allowances (Amendment) Bill, 2017 a pass a, MLA-te hlawh chu a leta tihpun a ni ang.

MLA hlawh a leta tih­pun a nih rual hian allowance pawh tihpun a ni dawn a, House member pension-te hlawh pawh tihpun remtih a ni bawk.

Parliamentary Affairs Minister Martin M Dang­ngo chuan, bill pass a nih tak avangin, MLA-te hlawh chu kumin January thla aṭang khan chhutin a leta tihpun a ni dawn a ni, a ti. Chief minister chuan thla khatah cheng nuai 1.09 a hlawh tawh dawn a, a hmain Rs 64,000 a hlawh ṭhin a ni. Deputy CM chuan cheng nuai 1.07 a hlawh ang a, opposition leader pawhin cheng nuai 1.07 a hlawh tawh bawk ang.

Member-te hlawh Rs 30,000 ni ṭhin chu Rs 60,000-ah a kaisang dawn bawk a ni.

Assembly Speaker hlawh Rs 63,600 ni ṭhin chu cheng nuai 1.08 a ni tawh ang a, deputy speaker hlawh pawh cheng nuai 1.06-ah a pung bawk. Cabinet minister-te hlawh Rs 63,200 pawh cheng nuai 1.07 a ni tawh dawn a, parliamentary secretary-te hlawh chu cheng nuai 1.06 a ni bawk ang. Assembly hian Meghalaya (Members’ Pension) (Amendment) Bill, 2017 a pass bawk a, MLA pension hlawh Rs 17,000 ni ṭhin chu Rs 30,000-ah a kaichhoh bakah, medical allowance chu Rs 5000 a tihpun a ni bawk.

Meghalaya Assembly hian kar kalta Zirtawpni khan kum 2017-18 atana state Budget cheng vaibelchhe 13,048 chu voice vote hmangin a lo pass tawh bawk. Chief Minister Mukul Sangma chuan budget hi a pharh a, state sum indaih lohna chu cheng vaibelchhe 1,236 a ni. Total expenditure atan cheng vaibelchhe 12,873 dah a ni a, revenue expenditure atan vaibelchhe 10,648 leh capital expenditureatan vaibelchhe 2,225-te ruahman a ni.

Kum 2017-18 chhunga state sorkarin chhiah aṭanga sum a hmuh tura bei­sei zawng zawng chu vaibelchhe 2,072 niin, state own tax revenue aṭangin vaibelchhe 1,559 leh, state own non-tax revenue aṭang­in vaibelchhe 513 hmuh beisei a ni. Infrastructure tih hmasawnna turin vai­belchhe 712.80 dah a ni a, kawngpui leh lei dawhna turin vaibelchhe 420.93 leh Agriculture and Horticulture atan vaibelchhe 285.94-te ruahman a ni. Infor­mation and Public Relations lama hmalakna turin vaibelchhe 9.80 ruahman a ni a, hei hian Meghalaya Media Society hnuaia senior accredited journalist-te hamṭhatna tur leh, scheme thar kalpuina tur te a huam a ni.