BSF-te fimkhur turin inchah

Border Security Force (BSF) chuan kar kalta Inrinnia Bangladesh-a bomb puak avang khan ramriah fimkhur zual tur leh, venhimna khauh zawka kalpui turin an inchah.

Bangladesh-a Sylhet khawpui-ah Inrinni khan bomb vawi hnih a puak a, he thil thleng vang hian India-Bangladesh ramri hnaia awm te chu fimkhur turin BSF chuan an chah a ni.

BSF Inspector Gene­ral, Meghalaya frontier P.K. Dubey chuan, "Tun hnaia Bangladesh-a bomb puak avang khan kan mi leh sa te chu fimkhur zual turin kan inchah a, pawikhawihtute ram chhungah an rawn luh lohna turin venhimna khauh zawka kengkawh turin kan inngen a ni" a ti. Bomb puah hnu hian Meghalaya Police-te nen pawh inbiakna an neih tawh thu sawiin, mipui himna tur ngaihtuaha hma an lak reng thu a sawi.

Sylhet-a bomb puakah hian mi paruk an thi a, an zingah hian Bangladesh police official pahnih an tel. A hmain Dhaka airport-a security checkpoint bulah thihchilh bomb tihpuah a ni bawk a, Islamic State-te chuan an tih a nih thu an sawi. He thil thlen hnu hian Meghalaya Police-te pawhin venhimna khauh zawka kalpui nghal a nih thu an sawi a, Bangladesh border chu khar nghal a nih thu an sawi. India leh Bangladesh inrina hi km 1,880 zet a ni a, heng zingah hian Tripura (856 km), Assam (263 km), Meghalaya (443 km) leh Mizoram (318 km)-te chu hmarchhak huam chhunga awm an nih avangin venhimna hi ngaihpawimawh a ni.