Assam forest department-in census kalpui

Assam forest department chuan kar kalta Inrinni aṭang khan Kaziranga National Park (KNP)-a sai awm zat chhiarpui, census a kalpui ṭan a, ni li chhung neih a ni ang.

KNP director Satyendra Singh chuan, a ni khatna leh a ni hnihnaah sai awm zat hi chhiar a ni ang a, ni thum leh ni li niah te an ek zir chian leh a ni ang a, heta ṭang hian sai awm zat dik tak hriat theih beisei a ni, a ti. Kum 2012 khan census hi kalpui a lo ni tawh tih sawiin, sai 1,165 an awm a ni, a ti. Kum nga danah census hi neih ṭhin a ni a, sai awm zat hi an pungchho zel niin a sawi. Singh chuan park hi zone 71-ah ṭhen a nih thu leh, zone hrang hrangah official tirh an nih thu a sawi. Census nei tur hian mi thiam rawih an ni a, tualchhung mi, NGO leh Indian Institute of Science, Bengaluru aṭang tein he hna thawk tur hi rawih an ni. Anni bakah hian forest department aṭangin field official 220 an awm a, anni hian uluk takin census hi an kalpui a ni.

Kaziranga National Park hi Assam khawpui Guwa-hati aṭanga km 190 vela hlaa aawm a ni a, UNESCO world heritage site-ah puan a ni. Park-ah hian khawvela hmuh tur awm zen zen lo samak ki pakhat nei ṭhahnem tak an awm avangin a lar phah hle a ni.