Manipur-a bus chesual-ah mi 10 an thi

Manipur-a Senapati district-ah nimin khan bus a chesual a, mi 10 an thih bakah, midang 25 velin hliam an tuar.

Police-te chuan bus hi Makan leh Chakhumai inkara Imphal-Dimapur National Highway 39-ah a chesual a, kawrah a tlan liam tih an sawi. Chetsualna hi zing lam dar thum leh a chanve vela thleng a ni a, bus hi Imphal pana tlan a ni. Chetsualna thlen chhan hi chhui mek a ni a, thi zat hi an la pun belh theih thu an sawi. Hliam tuarte hi Assam Rifles Maram Hospital-ah dahluh an ni a, mi ṭhenkhat chu an dinhmun a ṭha vak lo nia tarlan a ni. Hliam tuar ṭhenkhat hi Senapati District Hospital-ah lak an ni a, Regional Institute of Medical Sciences-ah mi pasarih dahluh an ni bawk.

Chief minister N Biren Singh chuan chetsualna thleng chu pawi a tih thu sawiin, nunna chan chhungte a tawrhpui thu leh, hliam tuarte pawh an dam leh thuai a duhsak thu a sawi. Sorkar chuan ṭanpuina awm thei ang a ngaihtuahsak dawn tih a sawi bawk. Singh hi New Delhi-ah President Pranab Mukherjee, Prime Minister Narendra Modi leh Union minister ṭhenkhat hmu turin a thang mek a, a tawrhpui thu hi facebook-ah a tarlang a ni.