Assam CM-in a cabinet siksawi, minister thar 2 lakluh belh

Assam chief minister Himanta Biswa Sarma chuan Ningani khan a cabinet siksawiin, minister thar pahnih a lakluh belh bawk.

Thla 13 liam taa Chief Minister atana lakluh a nih hnuah Sarma hian a cabinet a tihlenna hmasa ber a ni.

Minister atana lakluh tharte hi Congress aṭanga BJP-a inlet, Jayanta Malla Baruah leh BJP MLA term khatna atana thlan tlin, Nandita Gorlosa te an ni. Baruah hian public health engineering, skill, employment and entrepreneurship leh tourism a chang dawn a, Gorlosa hian power, cooperation, mines and minerals, indigenous and tribal faith leh cultural department-te a chang ang.

Chief Minister hian a minister-te chanpual siksawiin, ama chanpual bik erawh tihdanglam a ni lo.

Minister thar pahnihte hian Assam-a BJP kaihhruai sorkarah hian Chief Minister telin cabinet minister 16 an awm ta a, minister of state an awm lo thung.

Constitution 91st amendment-in a tarlan angin , chief minister huam telin minister hi Legislative Assembly-a member awm zat aṭanga 15% a pel tur a ni lo. Assam Assembly-a hian member 126 an awm a, minister hi 18 chin an nei thei a ni. Tunah minister 16 awm tawhin, CM hian pahnih dang a la ruat belh thei a ni.