Imphal-ah bomb chhar

Manipur khawpui, Imphal-a damdawi dawr bulah nimin khan improvised explosive device (IED) chhar a ni.

Bomb hi hmuh a nih veleh a chhehvel chu mipui tlawh theih loha khar nghalin, bomb sut tur hian bomb expert-te koh nghal an ni. He thil hi eng pawl mahin an tih a nih thu an la sawi lo.

Tun hnaiah Imphal-ah hian bomb a puak fo a, June 5 khan Little Flower School-ah bomb na tak tihpuah a ni a, bomb tipuaktu nia sawi, Thounaojam Rishi (46) chu police-ten an man tawh a ni.

Police-te chuan Rishi hi Little Flower School bakah, tun hnaia Imphal hmun danga bomb tihpuahnaah pawh a inhnamhnawih tih an sawi. May 5 khan Nagamapal-a dawr bulah leh, May 6-ah Khurai Thoudingjam Leikai-ah bomb hi tihpuah alo ni tawh bawk.

Imphal West SP K Sivakanta chuan thu zawhfiahnaah, Rishi hian National Revolutionary Front of Manipur helpawl chairman, Bangladesh-a inkhuar 'Doubllo' thupek anga ti a nih thu a sawi niin a tarlang. A kut aṭang hian puak thei thil eng emaw zat an man tel a ni.