Tripura : Mipuite lungawi loin BJP minister motor bei

Tripura-a Gomati district-a BJP hruaitute laka lungawi lohna lantira nawrh huaihawt, hmeichhiate police-ten kut an thlak hnu lawkah, BJP vice president Patal Kanya Jamatia leh tribal welfare minister atana lakluh thar Ram Pada Jamatia-te chu mi ṭhenkhatin beiin an motor an bei zui bawk.

BJP hruaitu pahnihte hi Sepahijala district-a Jampuijala area-a programme hmang tura kal an ni a, mipui lungawi lote chuan lungin an lo tawng a, an motor hi an khawihsak zui a ni. Tripura State Rifle jawan leh an personal security guard-ten hma la vatin, hruaitu pahnihte hian hliam nei loin him takin an hruaisawn a ni.

Tribal welfare minister Rampada Jamatia chuan, police-te hnenah a hmain an programme neih turte, buaina chhuah palh a hlauhthawnawm thute pawh hriattir lawk a nih thu sawiin, pawikhawihna thleng tur laka an veng zo lo chu a sawisel. Minister hian Pradyot Kishoe Debbarma kaihhruai TIPRA chu tharum thawhna thlengah mawhphurtuah a puh bawk. "Min beitute hi TIPRA mi leh sa a ni a, Left party-te pawhin a hmain misual tia an lo sawi tawhte an ni," a ti.

TIPRA chairman Debbarma chuan rorellai BJP laka mipuite lungawi lohna leh thinurna, hun rei tak lo tawh chu a puak chhuak ta niin a sawi. He thil hi politics thila inbeihna ni loin, BJP sorkar rorelna dik lo avanga mipuiten an lungawi lohna leh an manganna an lantirna a ni, a ti.