Sorkar laipuiin Manipur tan vaibelchhe 150 pek remti

Sorkar laipui chuan Mani­pur-a hmasawnna hna thawhna turin cheng vaibelchhe 150 pek a remti.

Manipur Chief Minis­ter Nongthombam Biren Singh chuan Thawhṭanni khan Prime Minister, Narendra Modi chu New Delhi-ah a hmu a, thil pawimawh hrang hrang a sawipui. Biren leh Prime Minister-te hian Mani­pur hmasawnna tura hma­chhawp hrang hrangte an sawi dun a, hemi atan hian sum ṭhahnem tak an ruahman. Sorkar laipui chuan Manipur sorkar tan hian cheng vaibelchhe 140-150 pek a remti a, hei bakah hian vaibelchhe 82 thlenga pek belh a remti nia tarlan a ni.

CM office thuchhuah chuan, Centrally Sponsored Scheme hnuaia project hrang hrangah sorkar laipui chuan 90:10 sharing pattern hman chhunzawm a remti a ni. Hei hian National Highway, four lane-a siamna tur pawh a huam tel a ni, a ti. NH-37 siam hna chu thawh ṭan tawh a ni a, hun eng emaw chen chawlhsan a nih hnuah April 1 aṭang khian chhunzawm leh tura ruahman a ni. Hei bakah hian Mini Secretariat sakna turin DoNER Ministry rawtna thlen a ni tawh tih a tarlang.

Chief minister office chuan district tinah women market din turin ruahmanna kalpui a nih thu a sawi a, a senso hi DoNER Ministry chuan a tum dawn a ni. Hei bakah hian khum 60 awm theihna tur mental hospital sak a ni dawn a, Health Ministry pawhin a pawmpui tawh a, Khuman Lampak sports complex-ah flood light bun a ni dawn a, hei pawh hi sports leh power ministry-ah thlen ani tawh tih a tarlang. Smart City Project hnuaiah flyover eng emaw zat siam tum a ni bawk.

Biren Singh hian chief minister atana lakluh a nih hnuah, United Naga Council (UNC) ten ni 139 zet Nationala Highway an danchah tawh chu a titawp a, anti-corruption cell din tura hma a lak mek bakah, hmasawnna hna thawhna tur ngaihtuahin central-a sorkar mipawimawhte a dawr kual a ni. UNC-te'n ni 139 chhung zet an dan chah hian nunphung a chawkbuai nasa hle a, hlih a nih tak avangin BJP kaihhruai sorkar hmalakna hi langsar hle a ni.