Manipur-a hmun hniha chetsualna thlengah mi 21 thi

Manipur-ah Thawhṭanni khan lirthei chetsualna ṭum hnih a thleng a, mi 21 an thih bakah mi dang 23 velin hliam an tuar.

Chetsualna hi Senapati leh Tamenglong district-a National Highway-a thleng a ni. State Home Department chuan hmun hniha lirthei chetsualna thlengah hian mi 21 an thih bakah, hliam tuar mi eng emaw zat an awm tih a tarlang. Imphal pana tlan Deccan Rajdhani Travel chu, Senapati district-a Chakumei lei bulah a chesual a, chuang zinga 12 an thih bakah, midang 17 velin hliam an tuar. Chetsualna thlenna hmunah hian mi 10 an thi nghal a, hliam tuar zinga mi pahnih chu an thi ve leh a ni. Hliam tuarte hi Assam Rifles hospital-ah dah an ni a, Regional Institute of Medical Sciences (RIMS) hospital-ah sawn leh an ni. Hliam tuar zinga ngaihtuah awm zual mi pangate chu Jawaharlal Nehru Institute of Medical Sciences (JNIMS) hospital-ah dahluh an ni.

Tamenglong district-a NH-37-ah pawh mihring phur lirthei a chesual a, chuang zinga mi pariat an thi a, thi zingah hian hmeichhia pahnih an tel. Motor hi feet 300 vela thuk kawrah a tla lut a, a hmunah mi pariat an thi a, midang parukin hliam an tuar a ni. Hemi ni vek hian Imphal aṭanga Dimapur pana tlan truck chu sesualin, a khalhtu a thi a ni.

Manipur Chief Minister N Biren Singh leh Governor Dr Najma Heptulla-te chuan chetsualna thleng chu pawi an tih thu an sawi a, thi chhungte an tawrhpui thu leh, hliam tuarte chu dam leh thuai tura an duh thu an sawi. State sorkar chuan thi chhungte chu cheng nuai hnih ṭheuh pek an nih tur thu a puang a, hliam tuarte pawh cheng 50,000 ṭheuh pek a tiam.