Mon massacre : Nagaland police-ten Indian Army sipai 30 lakah chargesheet thehlut

Nagaland police-te chuan nikum December thlaa Mon district, Nagaland-a sipaiten civil mi 14 an kahhlum chungchangah, Indian Army-a sipai 30-te lakah chargesheet a thehlut. Thubuai siamsak zingah hian Major pawh a tel.

State sorkarin Mon district-a thil thleng chhui tura a din, Special Investigation Team (SIT) chuan report an thehlut tawh a ni.

Director General of Police (DGP) Nagaland T John Longkumer chuan an thil chhuinaa an thil hmuhchhuahte hi Inrinni khan puangzarin, Mon district-a civil mite beihna thlengah hian Special Force Operation-te chuan Standard Operating Procedure leh Rules of Engagement an zawm lo tih a sawi. Mon district-a hel an channa hmun nia an sawiah hian awmze nei loa silaia an pawng kah avangin a hmunah civil mi paruk an thi nghal a, mi pahnihin hliam na tak an tuar a ni, a ti.

Inrinni liam taa Chumoukedima-a Rhododendron hall-a press conference a neihah, police hotu chuan SIT chuan civil mite beih a nih chungchang hi fimkhur leh uluk taka an chhui thu a sawi bawk. "April 2022 chawlhkar hmasa ber khan Department of Military Affairs hnenah CID report leh, heng sipaite thubuai siamsak dilna hi thawn a ni tawh a,an chhanna hi la nghah mek a la ni. An chhanna nghah chhung hian pawikhawihnaa inhnamhnawih nia ngaih mi 30 te lakah chargesheet hi thehluh a ni ta a ni," tiin a sawi.

Longkumer chuan 21 Para SF-a operation team mi 30 te lakah hian IPC 120B/302/307/326/201/34 hnuaiah thubuai hi ziah luh a ni tih sawiin, an zingah hian Major pakhat, subedar pahnih, havildar pariat, naik pali, L/Nk paruk leh paratrooper pakua an tel a ni.

Finfiahna hrang hrang, document hrang hrang te; Guwahati, Hyderabad leh Chandigarh-a Central Forensic Science Laboratory (CFSL)-a scientist-te ngaihdan, National Institute of Electronics & Information Technology (NIELIT)-a technical evidence-te pawh lak vek an ni tih Longkumer chuan a sawi bawk.

SIT overall supervisor, Nagaland Additional Director General of Police (Law and Order) Sandeep Tamgadge chuan he thil thleng chhui hian civil mi 85 leh security pesonnel 37 te thu zawhfiah an ni tih a sawi a, Mon district-a sipaiten civil mite an kahhlumna hmun hi team hian ṭum eng emaw zat an tlawh a ni, a ti. Inkahna thlenna hmuna lei leh thisen sample-te pawh lain, Guwahati leh Hyderabad-a Central Forensic Science Laboratory-ahte thawn a ni.

Army lam pawhin Mon district-a thil thleng hi a hranin an chhui ve bawk. May 10 khan Army chief Gen Manoj Pande chuan investigation hi zawhfel a nih tawh thu leh, report pawh enfiah mek a nih thu a sawi.