Manipur CM-in JNIMS-ah project hawng

Manipur chief minister N Biren Singh chuan Inrinni liam ta khan Imphal-a Jawaharlal Nehru Institute of Medical Sciences (JNIMS)-ah khum 30 awmna pyschiatry ward, child care centre leh public waiting shed a hawng.

Chief Minister chuan a kaihhruai sorkar chuan state mipuite hnena healthcare facility ṭha pek chu a dah pawimawh hle tih sawiin, kum nga liam ta chhungin healthcare sector chuan hma a sawn nasa hle tih a sawi.

"Health sector hi sector pawimawh ber zinga mi, state sorkarin a dah pawimawh ber a ni. Kum nga chhungin health sector hmasawnna turin CMHT, CM health for all, PMJAY te kalpui a nih bakah, healthcare infrastructure lam pawh nasa taka thuam a ni," a ti. Health sector kaihhnawih project eng emaw zat kalpui mek a ni tih a sawi bawk.

JNIMS-a CM hun hmanah hian Health Minister Sapam Ranjan, PHED minister L Susindro Meitei, MLA Kh Ibomcha, Chief Secretary Rajesh Kumar, JNIMS Director leh senior official eng emaw zat an tel a ni.