ULFA-I-te'n China chungchang sawi lo turin Dalai Lama an vau

Assam-a hel pawl lian tak United Liberation Front of Assam-Independent (ULFA-I)-te chuan Tibetan sakhaw puithiam, Dalai Lama chu China chungchang sawi chhuak lo turin an vau.

Dalai Lama hian April 1 khian Assam a tlawh dawn a, Namami Brahmaputra festival a hmanpui dawn a ni. ULFA (I) chairman Abhizeet Asom chuan, "Dalai Lama hi India leh China chungchang sawi chhuak lo turin kan ngen a, Assam leilungah hetiang thil sawi chhuah hi kan rem ti lo a ni. China hi Assam ṭhian ṭha tak a ni a, inzawmna thuk tak kan nei a ni" a ti. China nen hian Assam chuan culture leh kawng dangah te inzawmna ṭha tak an nei niin Asom chuan a sawi bawk.

Dalai Lama hian tun Inrinni hian Guwahati a pan dawn a, ni 12 chhung hmarchhak hmun hrang hrangah hun a hmang ang. Assam-a ITA Center-ah hun a hmang dawn a, April 2-ah Gauhati University-ah thu a sawi dawn a, April 3-ah Dibrugarh University-ah thu a sawi dawn bawk a, hei bakah hian IIT Guwahati a tlawh dawn nia tarlan a ni. April 5-12 chhung Aruanchal Paradesh-ah hun a hmang dawn a, China ramri depa awm Tawang a tlawh dawn bakah, Lumla, Dirang, Bomdila leh Itanagar-ah te hun a hmang ang. China chuan Dalai Lama-a'n hmarchhak state a tlawh tur hi na takin a sawisel a, India leh China inkar tichhe thei thil niin a sawi. Hetih lai hian India sorkar chuan Dalai Lama chu ram chhung a duhna hmun tlawh a phal sak thu a lo sawi tawh thung.