Manipur NPP MLA pali Delhi-ah hruai

Manipur-a BJP kaih­hruai ṭangrual sorkar  thlawptu MLA pakuain sorkar thlawpna an hnuhdawk avangin sorkar dinhmun a derthawng mek a, Congress chuan sorkar thar siam tumin hma a la nghal a ni. 

Sorkar thlawpna  hnukdawktute hi BJP MLA pathum, National People's Party (NPP) MLA pali, Trinamool Congress MLA pakhat leh independent MLA pakhat an ni. BJP MLA pathumte hian Congress party an zawm nghal a ni. 

Congress chuan chief minister N Biren Singh kaihhruai sorkar chuan thlawptu a ngah tawk tawh lo nia sawiin, ṭangrual sorkar thar siam tumin hma a la a, NPP MLA te pawhin thlawp an tum a ni.  Congress hruaitu leh chief minister hlui, O Ibobi Singh chuan sorkar thar din tumin, ṭangrual pawl pawh an din nghal bawk.

Mahse Pathianni khan Assam health minister leh BJP hruaitu Himanta Biswa Sarma leh NPP president, Meghalaya chief minister ni bawk Conrad Sangma-te chu Manipur-ah kalin, NPP leh BJP inkar boruak siamṭhat tumin an bei nghal a ni. Sarma leh Sangma-te hian NPP  MLA-te hi thlem lungawi tumin an kawm a, hemi hnu hian an pali hian Guwahati-ah an hruai  nghal a ni. Nimin khan BJP chuan Guwahati aṭangin NPP MLA-te hi Delhi-a an party hotute hmu turin an hruai leh nghal. 

NPP MLA pali-te hi chief minister Biren Singh rorel danah an lungawi lo a, Chief Minis­ter hi thlak an phut a ni. Hemi chungchang hi Delhi-a BJP hruaituten an sawiho ang. 

North-East Democratic Alliance (NEDA) convener ni bawk, Himanta Biswa Sarma chuan inhriatthiamna ṭha tak an neih ngei a rin thu a sawi. 

Member 60 awmna Manipur assembly-ah hian BJP pathum te an bang tawh a, Congerss MLA panga leh Trinamool Congress MLA pakhat chu disqualify niin, tunah hian NDA kaihhruai ṭangrual pawl hian member 22 a nei a, Congress kaihhruai ṭangrual pawlin MLA 29 a nei mek a ni. 

Ibobi Singh kaihhruaia Cong­ress-in sorkar thar din tuma hma a lak hnu lawkah, Central Bureau of Investigation chu cheng vaibelchhe 332 tiching­pena puh a nih chungchangah Ibobi Singh hi thu zawtfiah turin Imphal-ah an kal nghal bawk.