Assam-ah hri kai 6,000 an chuang tawh

Assam-ah Covid-19 an la pung chak hle a, Thawhlehnia sample endik zingah mi 203 in an kai tih hriat belh a ni. Hri kai hmuh tawh hi mi 6,056 an tling tawh.

Thawhlehni vek khan hri kai zinga 197 chu an dam tawh avangin enkawlna hmun aṭangin chhuah tir an ni a, hri kai dam tawh hi mi 3,762 an awm tawh a ni. He hri hi mi 11 in thihpui tawhin, enkawl mek mi 20,79 an awm bawk.  

Assam-ah hian hri kai an pun chak avang leh, Guwahati khawpuiah hmun danga zinchhuahna nei lo zingah hri kai hmuh belh zel an nih avangin state sorkar chuan khawpui chhunga ward 11-ah total lockdown a puang a, June 23 zan dar 9 aṭangin hman ṭan nghal a ni. 

Mipuia hri darh tur venna atan health department chuan Guwahati khawpuia test runpui a nei mek a, June 30-ah mi 50,000 test hman a tum. Mi tam zawk test an nih theihna atan ward tinah sample collection dah a nih thu health minister Himanta Biswa Sarma chuan a sawi.