Assam : KAAC inthlanah BJP-in seat awm zawng zawng la vek

Assam-a Karbi Anglong Autonomous Council (KAAC) inthlan, Pathiannia neih takah BJP chuan seat awm zawng zawng, seat 26-ah hnehna a chang vek.

BJP hian kum 2017-a KAAC inthlanah khan seat 24 a la a, tun ṭumah seat la fai vekin a term hnihna atan thuneihna an chang leh ta a ni. Eptu party lian ber, Congress chuan seat awm zawng zawngah candidate siam mah se, seat khat pawh la loin a artelukawn a ni.

Chief minister Himanta Biswa Sarma chuan KAAC inthlana a term hnihna atana hnehna an chan leh avangin Karbi Anglong mipuite chungah lawmthu a sawi. Urban body leh Guwahati Municipal Corporation inthlana hnehna an chan hnuah, KAAC inthlana chiang taka hnehna an chang leh chuan mipuite'n prime minister Narendra Modi hmalakna leh hmathlir a neihte an thlawpzia leh an rintawkzia a lang a ni, a ti.

Prime minister Narendra Modi pawhin a twitter-ah Karbi Anglong-a inthlan result ropui tak an nei chu lawmawm a tih thu tarlangin, BJP-ah rinna an nghah ngam zel avangin mipuite hnenah lawmthu a hrilh a, Assam hmasawnna turin theihtawp an chhuah zel tur thu a sawi nghal bawk.

Assam-a Sixth Schedule hnuaia tribal council upa ber zinga mi, KAAC hi kum 1952-a din a ni. A hma chuan Mikir Hills District Council tih a ni ṭhin a. An headquarters chu Diphu-ah a awm a ni. Council hian Karbi Anglong leh West Karbi Anglong district a huam a, Assembly seat pali leh parliamentary constituency pakhat (Diphu) a awm.

Kum 2001-2015 chhung khan KAAC-ah hian Congress chuan thuneihna an chang a, kum 2016-ah BJP chuan a vawi khatna atan sorkarna an rawn siam a ni.