Manipur sorkarin dan loa in sak 69 tihchhiatsak

Manipur sorkar chuan Thoubal district-a Waithou Protected Reserved Forest huam chhunga dan loa in sak, in 69 chu Pathianni khan a tichhia.

Manipur chief minister N Biren Singh chuan kar liam ta khan forst leh revenue department hotute nen meeting neiin, official-te chu forest department rama dan loa in sakna tur ram pek an nih chungchangah a hau zui bawk a ni. Singh chuan, "State chhung hmun hrang hranga dan loa sorkar rama awmte chhuahtir turin hma lak a ni," a ti.

Pathiannia Thoubal Forest division-a eviction drive neihah hian state security force-ten an pui a, zing dar 7 aṭanga thawk ṭanin, chawhma dar 11:30 velah an zo a ni.

Thoubal forest division chuan forest rama awmte hnenah hian June 3 khan hriattirna pe tawhin, chhuah tir an nih lohna chhan tur sawifiah tura hriattir an ni a, hun tiam chhunga an insawifiah theih loh avangin eviction drive hi neih a ni ta tih a sawi.

Hriattirna an pekah hian an awmna ram chu Waithou Protected Forest ram chhunga cheng te hnena patta/jamabandi leh allotment order pek chu Thoubal DC chuan June 9 khan a cancel a, he hmuna chengte chu insawnchhuak tur leh, a in sakte pawh June 11 tlai dar 5 hmaa ṭhiat vek tura hrilh an ni.

Thoubal DFO chuan Protected Forest area chhungah hian dan loa khawsa, mi 180 chuang an awm tih sawiin, Pathianni khan in 69 hi tihchhiatsakin, a bak pawh la tihchhiat tur a nih thu a sawi.