Nagaland CM-in budget pharh

Nagaland Chief Minister Shurhozelie Lie­zietsu chuan kum 2017-18 atan state budget chu Thawhlehni khan a pharh a, state sorkar sum indaih lohna chu cheng vaibelche 1,437.84 a ni.

Finance changtu Lie­zietsu chuan, kum 2017-18 chhung atana state sorkarin sum a hmuh zat beisei chu cheng vaibel­chhe 16,657.26 a ni a, hman ral tura ruahman chu vaibelchhe 16,365.17 a ni tih a sawi. Sum hmuh tur aia hman ral tura ruahman a tam zawkna hi vaibelchhe 1,437.84 a ni. Sorkar sum hman tihtlem a nih avangin sorkar kum tawpah balance vaibelchhe 220.04 a awm theih beisei a ni. CM Liezietsu chuan budget tharah hian zirna leh hriselna lam ngaih pawimawh a nih thu sawiin, thingtlang khuate chawikan leh, chhungkaw khawsak harsat te dinhmun ṭha zawka chawikan chu an ngaih pawimawh ber a nih thu a sawi bawk.

Chief Minister chuan Naga hel National Socialist Council of Nagaland - Isak-Muivah (NSCN-IM) chungchang sawiin, sorkar laipui chuan kum 2015 August thla khan inremna 'Framework Agreement' a lo ziahpui tawh a ni, a ti. Inremna tluantling ziak turin hma lak mek a ni a, boruak muanawm tak hnuaiah kalpui a ni, a ti. Tun hnaia tribal pawl hrang hrangten Urban Local Body (ULB) election-a hmeiche tan seat 33% hauhsak duh lohna lantira nawrh an huaihawt chu pawi a tih thu sawiin, state sorkar chuan Nagaland Municipal Act chu a ennawn dawn a ni, a ti. Siamṭhat ngai te a awm a nih chuan a ṭul dan anga siam ṭhat a ni ang a ti bawk.

Kum 2017-18 atana state budget hi nimin khan Assembly-ah sawiho a ni a, an pass nghal rin a ni.