Assam-ah water taxi service tir dawn

Assam sorkar chuan Guwahati khawpui leh a kianga airport inkarah water taxi a service tir dawn.

Industry Minister Chandra Mohan Patowary chuan he thu hi Thawhlehni khan sawiin, sorkar chuan water taxi 50 service tir thuai turin hma a la mek a ni, a ti.

Hei hian state khawpui Guwahati leh a bul hnaia airport inkalpawhna kawng awlsam zawkin a hawng dawn a, motor kawngpui pangngai aiin minute 18 velin a hnai zawk dawn a ni, a ti. Sorkar chuan khawmual leh tui lama inkalpawhna kawngah nasa takin hma a la a, tui chunga inkalpawhna ṭha zawk siam turin hma lak a nih thu a sawi.

Minister Patowary chuan, Lokapriya Gopinath Bordoloi International Airport (LGBI) chu chei ṭhat a nih tur thu sawiin, water taxi hmanga awlsam zawka tlawhpawh theiha siam a nih tur thu a sawi. Water taxi hi Assam State Transport Corporation (ASTC) in a enkawl dawn a ni. Hei bakah hian sorkar laipui chuan Brahmaputra leh Barak luiah te national waterway pakua siam a remti bawk.

Assam sorkar chuan Brahmaputra lui-ah national waterway eng emaw zat siam tumin hma a la a, hemi tur hian sorkar laipui nen pawh inremna an ziak thuai dawn a, Sadiya leh Dhubri inkar inkal pawh nan te, Brahmaputra lui kal tlanga ṭhenawm ram Bangladesh kalpawhna tur pawh ruahman a nih thu, Industry Minister Chandra Mohan Patowary chuan a sawi.