Assam leh Meghalaya CM-te'n ramri chungchang sawidun dawn

Meghalaya Chief Minister Mukul Sangma chuan Arpril 3 khian ramri chungchangah Assam Chief Minister Sarbananda Sonowal a hmu dawn.

Meghalaya official chuan state pahnihte hian ramri chungchang sawidun an remti tih sawiin, April thla tir khian inbiakna hi neih a ni ang, a ti. Sangma hi assembly deputy speaker Roytre Christopher Laloo, Home Minister Horju Donkupar Roy Lyngdoh, Law Mi­nister Roshan Warjri, Border Area Development Minister Prestone Tynsong leh a Chief Adviser D.D. Lapangte'n an ṭawiawm dawn a ni.

CM Sangma hian Assam Chief Minister hlui Tarun Gogoi chu ramri chungchangah hian June 5, 2010 khan inbiakna a lo neihpui tawh a, state pahnihten ramri chungchanga buaina an neih ṭhin chu chinfel a duh a ni. Meghalaya sorkar chuan document leh map aṭanga a landan chuan 12 sectors/area huamchhunga Upper Tarabari, Gizang Reserve Forest, Hahim, Langpih, Borduar, Boklapara, Non-gwah-Matamur, Khanapara-Pillangkata, Deshdemoreah, Block I and Block II, Khanduli-Psiar leh Ratacherra-te chu a ram chinah a chhal. Document leh map-te hi Assam sorkar hnenahah pawh an pek tawh thu tarlan a ni.

Assam CM Sonowal chuan Meghalaya, Naga­land leh Mizoram-te nena ramri chungchanga buaina an neih ṭhin chingfel tura hma a lak tur thu a lo sawi tawh a ni. Hetih lai hian Assam, Nagaland leh Arunachal Pradesh-te ramri chungchang chu Supreme Court-ah thlen a ni a, tun thlengin chinfel a la ni lo.